CEBU, Philippines - Mipatigbabaw ang opensa sa Rain or Shine Elasto Painters human nila gipukan ang GlobalPort Batang Pier, 98-87, alang sa ikaupat nilang sunod-sunod nga kadaugan sa naghinapos nga elimination round sa PBA Philippine Cup kagahapon didto sa Smart Araneta Coliseum.
Sa maong kadaugan, ang E-Painters misaka sa ikatulong dapit sa standing sa ilang 7-4 win-loss record diin nagsunod sila sa top seed nga Barangay Ginebra-San Miguel ug Petron Blaze Boosters.
Gipauwanan og three-point shots sa mga tirador sa Rain or Shine ang GlobalPort sa first half sa pagpangulo ni point-guard TY Tang kinsa mihipos og otso puntos sud sa duha ka kuwarter diin milabaw ang E-Painters, 46-38.
Wa pa matagbaw, ang Rain or Shine ug subli nilang gipaarakan og puntos ang GlobalPort nga miresulta sa pagburot sa ilang labaw ngadto sa 80-65 sa uno minuto sa bahin sa third period.
Ang rookie sa Rain or Shine nga si Alex Nuyles maoy nangulo sa iyang 16 puntos, samtang sila si Jervy Cruz ug Tang nagkumboya og 24 puntos.
Ang Fil-American veteran nga si Jay Washington miburak og 26 puntos alang sa GlobalPort nga nakatilaw karon sa ikaupat nga sunod-sunod nilang kapildehan ug minaug sila sa 4-7 win-loss record diin nagtabla sila alang sa ikalima ngadto sa ikawalong luna paingun sa playoffs uban sa Barako Bull, Meralco ug Alaska. (BANAT PALARO)