CEBU, Philippines - Agi'g pagpangandam alang sa umaabot nga edisyon sa 2014 Sinulog Football Festival, ang mga coaches uban sa mga tournament organizers mopahigayon sa ilang final meeting ugma diha sa Cebu City Sports Center (CCSC).
Ang Sinulog Cup ning tuiga mosikad sa Enero 11 sa duha ka managlahing binyu -- ang San Roque Parish Football field ug Aboitiz SportsField nga pulos sakop sa Brgy. Subangdaku sa dakbayan sa Mandaue.
Ang kompetisyon naglakip sa under-7, 9, 11, 13, 15 ug 18, inter-BPO, men's and ladies' open ug ang 38-above division.
Ang under 7 hangtod sa 11 categories mahimong magsagol sa gender sa usa ka team, samtang ang under 15, 18 ug inter-BPO buwagon sa boys' ug girls' divisions. Ang ubang mga kategoriya alang na lamang sa male players.
Ang mga partisipanteng koponan moduwa sa 7-a-side format gawas lang sa under-7 nga motamod sa five-a-side format.
Aron dili malangan, ang mga organizers molimit lamang sa gidaghanon sa teams matag dibisyon ngadto sa labing daghan 10 gawas lang sa men's open nga adunay 20 teams.
Alang sa dugang mga pakisayod kalabot sa maong torneyo, niadtong interesado mahimong motawag sa CFA office sa 253-0235 o ngadto ni Francis Ramirez sa 0923-4541353/0920-3489009 ug Greg Balsicas sa 0923-7113100.
Mahimo sab nga mo-email sa organizers sa sinulogcup@yahoo.com.ph. (BANAT NEWS)