USJ-R mikuha'g reinforcement alang sa Shakey's V-League

CEBU, Philippines -  Ang University of San Jose-Recoletos (USJ-R) mikuha og reinforcement alang sa ilang kampanya sa umaabot nga Shakey's Girls Volleyball League Battle of  Champions unya sa Enero 12, 2014 didto sa Ninoy Aquino Stadium sa Manila.

 Human midaog sa Cebu leg, ang USJ-R mopalig-on sa ilang line-up diin mikuha sila'g duha ka players gikan sa Saint Theresa's College (STC) ug sa Mandaue City Comprehensive National High School (MCCNHS) ug mikuha sab sila og duha ka imports gikan sa USJ-R ug SWU college  teams.

 Ang college players ug langyaw'ng imports tugtan pagduwa sa usa ka team sa national finals kun nasulod sila sa age limit.

 Mosangkap sa dugang puwersa sa baby spike Jaguars mao sila si Jesse Marie Joquia sa USJ-R ug Therese Rae Ramas sa SWU.

 Ang duha ka magduduwa   nga gibira sa USJ-R coaching staff aron idugang sa ilang line-up mao silang Paula Maninang sa STC ug Maria Dominique Pacres sa MCCNHS.

 Silang Maninang ug Pacres nga mipakita sa ilang tim-os nga performance atol sa Shakey's Cebu leg girekomendar aron mo-tryout alang sa national pool uban sa laing 22 ka mga Sugbuanon.

 Mohitsas sa baby spiking Jaguars nga morepresentar sa Sugbu sa national finals didto sa Manila mao sila si Rica  Rivera, Kaye Araon, Florain Camacho, Deanna Wong, Daniella Alfeche, Sheen Durango ug Ana Aldave. (BANAT PALARO)