Ty labing masidlakon nga CEPCAN ning tuiga

CEBU, Philippines -  Usa ka chess player gikan sa Tacloban maoy nahimong grand champion sa Cebu Executives and Professionals Chess  Association (CEPCA) tournament.

 Si Jimmy Ty Jr., usa ka civil engineer kinsa konektado sa Primary Structures Corporation mipukan sa laing 11 ka monthly champions aron maangkon ang katungod isip labing maayo ug masidlakon nga CEPCAN ning tuig atol sa grand finale sa maong kalihukan niadtong Domingo  sa gabii didto sa Lola  Saling's Grill and Seafood Restaurant sa Brgy. Casuntingan, dakbayan  sa Mandaue.

 Ang 28-anyos nga si Ty, mitugkad sa kampiyonato human  niya gipilde si Manuel Abucay, kinsa usa sab ka ehinyero nga nangalagad sa Department of Public  Works and Highways (DPWH)-Mandaue sa semifinals. Giparot usab niya si Peterson Sia sa iyang katapusang duwa aron mogawas isip labing maayo sa tanang kampiyon.

 Si Percival Fiel, kawani sa Department of Environment and Natural Resources (DENR) mi-okupar sa ikatulo, gisundan nilang Abucay ug Maggi Dionson nga miangkon sa ikaupat ug ikalima nga dapit. Si Rey Flores, ang grand winner sa miaging tuig napunta sa ikaunom.

 Sa laing bahin, ang 25-anyos nga si Carlo Maraat, usa ka sertipikadong public accountant nga nadestino sa Department of Budget and Management (DBM) regional field office, maoy nidominar sa CEPCA non-qualifiers tournament.

 Si Maraat mirehistro og 4.5 puntos aron maghari sa 5-round Swiss system competition. Si Amado Olea, staff sergeant gikan sa Philippine Air Force (PAF) ug si Jun Pasion parehong miposte'g 3.5 puntos, apan si Olea maoy miangkon sa ikaduha pinasikad sa higher-tie-break output gamit ang Bucholz system.

 Si SPO Ruel Hortelano mipuwesto sa ikaupat, samtang ang immediate past CEPCA president nga si Jojo Muralla maoy mikompleto sa top five finishers.

 Sa laing bahin, si Jerry Maratas, usa ka civil ug structural engineer pormal na nga miasumer sa iyang katungdanan isip bag-ong club president sa tuig 2014.

 Si kanhi Cebu City mayor   Alvin B. Garcia maoy mitunol sa ganting salapi ug mga tropeyo ngadto sa mga mananaog. Giabagan siya nilang  Maratas, Muralla, CEPCA founder Boy Pestaño ug sports committee chairman Jun Olis.

 Si Garcia mao sab ang mipapanumpa sa bag-ong hut-ong sa opisyales sa CEPCA nga gipangulohan ni Maratas,  kinsa nanag-iya  Jemar Engineer Services nga ispesyalista sa civil ug structural design sa medium ug high-rise buildings.

 Nanumpa sab sa ilang katungdanan mao silang Marvyne Guardiana (VP-external), Dante Arguelles (VP-internal), Jun Olis (secretary), Jun Kidlat (treasurer), Ruel Hortelano (auditor) ug Mandy Baria ug Jojo Muralla (board members). (BANAT NEWS)