SWU midaog sa La Salle sa PCCL
CEBU, Philippines - Dili na maggikan sa National Capital Region (NCR) ang labing maayong collegiate basketball team sa nasud karong panahona
gumikan kay gipakgang na kini Southwestern University (SWU) Cobras, ang pambato sa Sugbu.
Ang Cebu champion SWU mipuhal sa reigning UAAP titlist La Salle, 68-58 sa overtime nga naghawan sa ilang agianan alang sa
12th Philippine Collegiate Champions League kagahapon didto sa Blue Eagles Gym sa Quezon City.
Ang tagsa ra kaayong pasudlon nga si Fil-Am Melvin Holper mipasud sa tanang tulo niya ka three-pointers sa kinatibuk-an
niyang nuybe puntos, usa sa nanghinapos nga bahin sa regulasyon ug duha sa overtime nga maoy nagselyado sa dakung kadaugan sa
Cobras.
Apan si Monbert Arong maoy topscorer sa Cobras pinaagi sa iyang 17 puntos, milangkat og lima ka rebounds ug gilamasan og
duha ka steals.
Ang kanhi DLSU Archer nga si Mark Jayven Tallo kuyaw sab kaayong nakaduwa diin mipupo kini'g 13 puntos uban ang unom
ka rebounds ug unom sab ka assists. Si Adam Mohammed mipugnit og 12 puntos ug pito ka rebounds, samtang si Landry Sanjo adunay
11 puntos, 13 ka rebounds, tulo ka steals ug upat ka blocks alang sa Cobras, kinsa naglaraw nga mahimong unang team gawas sa Big City
nga midaog og titulo ning tinuig nga torneyo.
Ang La Salle maoy midiktar sa halos tanang duwa ug ila na unta mapukan ang bisitang SWU.
Apan naguba ang duwa sa Archers dihang ang Cobras hinay-hinay nga mikamang sa hiniusang puwersa nilang Arong, Sanjo,
Mohammed ug Tallo, kinsa niduwa og usa ka season sa La Salle sa wala pa mobalik sa Cebu.
Ang Archers niduwa nga wala si Arnold Van Opstal tungod sa hip injury, samtang si Jeron Teng, ang UAAP Finals MVP igo
lang miiskor og siyete puntos hinungdan sa pagkahagba sa La Salle. (BANAT NEWS)
- Latest
