CEBU, Philippines - Subling gipakita ni rising featherweight star ‘Prince’ Albert Pagara sa ALA Boxing Gym ang iyang katakus dihang gikulata niya si Gadwin Tubigon aron makuha ang unanimous decision nga kadaugan sa main event sa ALA Promotions ug Cobra Energy Drink ‘Tunay na Lakas Boxing’ niadtong miaging gabii didto sa Freedom Park sa Dumaguete City, Negros Oriental.
Ang kanhi amateur standout nga si Pagara wala nakahimo sa iyang saad nga knockout nga kadaugan, apan gipabilib gihapon niya ang mga fans human niya dabo-dabohi sud sa 10 ka rounds si Tubigon.
Pipila ka higayun nga nakapatugpa og kusug nga kinumo si Pagara nga mipasarasay ni Tubigon, apan mipakita kini sa kalig-on aron humanon ang 10 rounds.
Human sa away, tulo ka mga hurado ang mihatag og 97-94, 99-92 ug 98-92 tanan pabor ngadto ni Pagara kinsa mipalambo sa iyang record ngadto sa 18-0, 12KOs, samtang si Tubigon nakahiagum sa iyang ikawalong pilde sud sa 19 ka career fights.
Dili susama ni Pagara, pait ang gidangatan sa laing ALA prospect nga si Juren ‘Turbo’ Labordo kinsa nakatilaw sa labing una niyang kapildehan batok sa dili kaayo ilado nga si Jaymart Troyco sa Parañaque City sa supporting bout.
Midaog sa undercards mao sila si Roma Rate batok Reymund Tabogon, Boyce Sultan batok Roy-Roy Sumugat , Crispin Parba batok Marvin Catipay, Kim Galon batok Belmar Plaza, Raul Yu batok Andrew Palas, Geo Santisima batok Jamjam Ungon ug Jay Solomon batok Eddie Liparanon . (BANAT PALARO)