CIPU-BOC Finals MJDL Brokers batok Rollway-Petracorta

CEBU, Philippines - Parehong gipalagpot sa top two seeded teams ang managlahi nilang karibal aron mahitabo ang usa ka final rematch tali sa MJDL Brokers batok sa Rollway-Petracorta Brokers.

Magbagat sa finals ang MJDL Brokers batok sa Rollway-Petracorta Brokers alang sa korona sa 1st CIPU-BOC basketball tournament karong Miyerkules sa gabii diha sa Cebu Coliseum.

Kini human modaug sa semifinals ang MJDL batok sa 4th-seed nga Global Carrier sa iskor, 77-62 samtang ang mi-rally sa second half ang no. 2 seed Rollway-Petracorta aron pakgangon ang third seed ROSCAN Liners, 68-58.

Ang Global Carrier ug ang  ROSCAN maoy mag-ilog sa ikatulong pwesto.

Mao na kini ang ikatulong higayon nga magtakos sa finals ang MJDL ug Petracorta apan sa laing torneyo ang duha nila ka face-off--ang una sa CCUPA duha na ka tuig ang milabay didto sa Cogon-Ramos gym diin maoy kampyon ang CCUPA ug ang ikaduha atol sa Customs Invitational tournament dili pa lang kaayo dugay ug nakabawos ang MJDL.

Sa miaging tuig, ang ROSCAN nga nagdala pa sa Canilllas Customs Brokerage, maoy kampiyon.

 Yano kaayong gilubong sa MJDL ang Global Carrier tungod sa mga puntos gikan nilang Nico Laborte kinsa maoy nangu sa opensa sa iyang 19 puntos ug nilang Daniel Enriquez ug Baeng Medalle sa ilang 16 ug 13 puntos matag usa.

Teamwork maoy hinagiban ug maoy naghatag og dakung bentaha alang sa MJDL batok sa Rollway-Petracorta sa finals tungod kay dugay na kaayo silang nagkauban sa team samtang ang Rollway-Petracorta managkaribal kanhi apan bag-o lang naghugpong sa tinguha nga ilang ma-ilog ang titulo sa ikaduha nilang pagbagat karong tuiga.

Si Chris Manulat maoy nangu sa Global Carrier sa iyang 12 puntos ug laing tulo ka teammates ang mibahug sab og double figures nga silang Ramil Aniñon, Kenneth Maningo ug Elmer Miscala.

Sa laing bahin, ang Rollway-Petracorta kinsa biya sa unang duha ka quarters, mihimo'g mainitong rally sa second half ilabi na didto sa fourth period dihang mipabuhagay og sagunson siete puntos si Glenn Urbina nga maoy nahimong kontrabida sa ROSCAN kinsa naglabaw unta og 15 puntos, 29-14 sa uwahing bahin sa second period.  

Si Urbina maoy nangu sa Rollray-Petracorta sa iyang 22 puntos ug si Francis Palero kinsa diriyot mapiang dihang mikagat siya sa hata o "fake" sa iyang kontra, midugang og 18 puntos.

Ang ROSCAN Liners ni team owner Roy Canillas gipangulohan ni Gerry Singson sa iyang 19 puntos apan bugtong siya ra maoy nakahimo'g double figures sa ilang team.

Puntos matag usa:

First Game:

MJDL (77)—  Laborte 19, Enriquez 16, B. Medalle 13, Abellana 8, Largosa 6, Gambe 5, Elloren 4, Rollon 4, Arreglo 2,

Global Carrier (62)— Manulat 12, Aniñon 11, Maningo 10, Miscala 10, Cedeño 6, Caynita 5, Pastor 3, Banghal 3, Lahoylahoy 2, Cabillada 2, Diaz 1.

Second Game:

Rollway-Petracorta (68)—   Urbina 22, Palero 18, Tarona 7, Sagario 6, Moral 2, Palad 2, Sagarino 2, M. Petracorta 2, N. Petracorta 2, Villaronza 2, Solidarios 2, Dela Pieza 2, Petracorta 1.

ROSCAN Liners (58)—   Singson 19, Manlosa 8, Dellosa 8, Cayanong 7, Sillar 4, Cabañero 4, Villar 4, Sigue 3, Bensi 2, Piape 2. (BANAT PALARO)