CEBU, Philippines - Usa ka Japanese author gikan sa Tokyo ang mibalik na sab dinhi sa Sugbu aron magsuwat sa iyang ikaduhang libro sa eskrima.
Si Oshima Ryosuki, 42-anyos, kinsa dinhi na sa Sugbu niadtong 2011. Atol sa iyang tulo ka buwan nga pagpuyo, iyang gibisita
ang pipila ka arnis clubs nga kabahin sa iyang resource materials alang sa 200 ka pahinang libro nga iyang suwaton inig balik niya didto sa
Tokyo karong semanaha.
Matud ni Ryosuki nga lahi kaayo ang iyang kasinatian sa miaging duha ka tuig dihang una siyang mitunob sa Sugbu tungod
kay dinhi siya atol sa 7.2 magnitude nga linog didto sa Bohol ug mitay-og sab sa ubang bahin sa lalawigan niadtong Oktubre 15 ug ingon
man sa super typhoon Yolanda nga mikuso-kuso sa Visayas region niadtong Nobiyembre 8.
Si Ryosuki, kansang unang libro sa eskrima gititulohan og "Filipino Martial Arts" miingon nga daku kaayo niyang dungog nga
nagkahigala silang Supreme Grand Master Ciriaco 'Cacoy' Cañete, kinsa mihatag kaniya og certificate of completion atol sa iyang subsob
nga pag-ensayo sa Doce Pares World Eskrima Federation headquarters nga nahimutang sa dalan C. Padilla, ning siyudad.
Si Ryosuki, usa ka jujitsu champion nga nanag-iya sa Fuji Arnis Club nga nagbasi didto sa Tokyo, maoy ikaduhang Japanese
national nga nag-ensayo sa Cacoy Doce Pares sunod ni Shikiro Kameda niadtong 1960.