Casa Ilongga hari sa PICPA chess team tourney
CEBU, Philippines - Naghari ang Casa Ilongga sa PICPA Chess Team Championships nga bag-o lang natapos didto sa Deep Blue Café sa second level sa SM City-Cebu.
Ang Casa Ilongga nga gipangulohan ni team captain Rodrigo Ababat, Richard Natividad, Jimmy Ty Jr. ug Ceferino Visco mirehistro og 19 puntos ug igo lang gyud midaog og tunga ka punto batok sa Team Mayor Boen Cabahug.
Human mag-una sa unom ka ahugna, ang paboritong Department of Public Works and Highways (DPWH) nga gipangulohan sa mga beterano nga silang Rommel Ganzon ug Erwin Ababat nalabay sa ikatulo nga dapit sa ilang 17.5 puntos.
Ang BIR-Balbona ubos nilang Merben Roque, Venancio Loyola, John ug Jess Balbona miangkon sa ikaupat nga mihipos og 16.5 puntos, gisundan sa Team Hortelano sa ilang 14.5 puntos.
Ang BIR-Ivan Quijano mitapos sa ikaunom uban ang 9.5 puntos.
Mikompleto sa top eight finishers mao ang Cebu City Hall nga gipangulohan ni Anthony Makinano nga adunay 9 puntos ug University of San Carlos (USC) sa ilang 7.5 puntos.
Ang Presidente ug CEO sa Casa Ilongga nga si Raffy Uytiepo, kinsa mao sab ang physical conditioning coach sa Philippine chess team sa 1992 World Olympiad maoy midawat sa championship trophy. (BANAT NEWS)
- Latest
