Pacman Dominante, Pacquiao daog via UD, Rios gikulata

CEBU, Philippines -  Gituman ni Filipino ring superstar Manny Pacquiao ang saad nga pamatud-an nga usa gihapon siya sa mga boxing greats sa iyang henerasyon dihang iyang gikulata sud sa 12 ka rounds ang Mexican American nga si Brandon Rios sa ilang sangka kagahapon didto sa Cotai Arena sa The Venetian Hotel and Casino sa Macau.

Dala ang paglaum sa iyang mga kababayan, si Pacquiao hingpit nga mibangun sa iyang pangalan isip usa gihapon sa mga labing gikahadlokang boksidor dihang yanu niyang gilatos og kumo ang mas batan-on nga si Rios.

Si Pacquiao kinsa mihalad sa iyang away ngadto sa mga biktima sa bagyong ‘Yolanda’, migamit sa iyang makalibat nga kapaspas ug abtik nga kumo aron pauwanan og mga bangis nga kombinasyon si Rios kinsa tataw kaayo nga naglisud pag-adjust sa istilo sa ‘pambansang kamao’.

“This is not about my comeback,” matud pa ni Pacquiao sa Associated Press. “My victory is a symbol of my people’s comeback from natural disaster and a national tragedy.”

Wala man niya mapatumba, apan daghan gihapon ang midayeg sa gipakita ni Pacquiao tungod kay usa kini sa mga labing dominante niya nga kadaugan batok sa mas daku nga kontra.

Human sa 12 ka rounds, tulo ka mga hurado ang mihatag og 120-118,119-109 ug 118-110 tanan pabor ngadto sa kanhi eight-division world champion nga aduna na karoy record nga 55-5, 38KOs.

Si Pacquiao nagagikan sa sakit niyang sixth round knockout nga kapildehan sa mga kamot sa iyang Mexican rival nga si Juan Manuel Marquez niadtong Disyembre, apan ang Pinoy icon mipakita nga hingpit na siyang nakarekober gikan sa maong pait nga kasinatian.

Sa iyang bahin, si Rios kinsa nakatilaw sa ikaduha niyang kapildehan sud sa 34 ka away miangkon nga naglisud siya sa kapaspas ni Pacquiao, apan nangangkon nga wala siya masakiti sa mga kumo sa Pinoy boxer bisan pa og nagkadugo ug naputos sa bun-og ang iyang nawung.

“He never hurt me at all, and I never got stunned at all, but the quickness just caught me off guard,” matud pa niya.

Sa maong kadaugan, daghan ang nangutana kun kinsa ang isunod ni Pacquiao. Gitan-aw nga posibilidad mao ang posibleng rematch batok ni Marquez o usa ka ‘super-fight’ tali ni Floyd Mayweather Jr.  

2 Pinoy fighters daog sa undercard

Duha ka mga Filipino boxers nga miaway sa undercard sa Manny Pacquiao-Brandon Rios showdown kagahapon ang midaog usab batok sa tagsa-tagsa nila ka mga langyaw'ng kaatbang.

Ang sparmate ni Pacquiao nga si Dan Nazareno daling midispatsar sa Briton nga si Liam Vaughan kinsa iyang gipalukapa sa second round sa ilang sangka didto sa Cotai Arena sa Venetian Hotel and Casino.

Usa ka bangis nga combination ang gipatugpa ni Nazareno ngadto sa ulo ni Vaughan kinsa misurender sa naghinapos nga segundos sa second round.

Sa maong kadaugan ang Pampañgueno brawler mipalambo sa iyang record ngadto sa 18-10, 14KOs, samtang si Vaughan kinsa nagsilbe usab nga sparmate ni Pacquiao nakahiagum sa iyang ikaduhang pilde sa 10 ka away.

Laing Pinoy fighter nga misakmit sa daog mao ang katagilungsod ni Pacquiao sa General Santos City nga si Harmonito de la Torre kinsa milatos usab sa Indonesian veteran nga si Jason Butar-Butar sa ilang super featherweight bout.    

Usa ka nagpungasi nga uppercut ang gipasulod ni De la Torre ngadto ni Butar-Butar kinsa wala na kabarug sa 1:23 sa third round.

Ang 19-anyos nga si De la Torre misaka sa record nga 11-0, 6KOs, samtang si Butar-Butar nakahiagum sa ika-11 niyang pilde sud sa 26 ka away. (BANAT NEWS)