CEBU, Philippines - Gipakita sa Natasha SME nga andam na silang mosagubang sa mas labing daku nga misyon human kini mipakita sa ilang katakus pinaagi sa paglubong sa Kai Gas, 74-57 sa tune-up game nila niadtong Sabado didto sa Brgy. Buaya gym, dakbayan sa Lapu-Lapu.
Maayong pagkabahin ang opensa sa Natasha SME diin siyam sa ilang magduduwa ang nakapuntos.
Gipangulohan ang kadaugan ni Araño, kinsa miiskor og 14 puntos, samtang si Arnold de Asis miamot og 11 puntos ug si Vergara mitampo'g 10 puntos alang sa Natasha SME nga nagpanikad nang moladlad sa labok sa tinuoray na nga liga.
Si Arnold Sosmeña mibomba og 18 puntos ug si Jerry Kacubtan mitubil og 17 puntos alang sa Kai Gas nga wala kasugakod sa kabangis sa Natasha SME.
Ang duwa kabahin sa ilang pagpangandam alang sa Lapu-Lapu Sports Club (LLSC) Inter-Company basketball tournament nga gikatakdang sugdan karong Nobiyembre 30 sa alas-2 sa hapon didto gihapon sa Buaya gym.
Gipasiugdahan ang liga ni league organizer Billy Nadado sa abag nilang Lauro Soroño, Japeth Gacayan ug Christopher Sayson.
PUNTOS MATAG USA
NATASHA SME (74) - Araño 14, De Asis 11, Vergara 10, Sayson 9, Aying 9, Canjo 8, Bregente 6, Castolo 5, Maquiran 2
KAI GAS (57) - Sosmeña 18, Kacubtan 17, Lavandrie 6, Pagobo 6, Dakay 4, Alvarez 4, Caliquid 2