Nietes andam na sa iyang title fight

CEBU, Philippines -  Andam  na  si  two-division world champion Donnie 'Ahas' Nietes (31-1, 17KOs) alang sa  pagdepensa niya sa iyang WBO light flyweight title batok sa kanhi Mexican champion nga si Sammy 'Guty' Gutierrez (33-9, 23KOs) sa main event sa "Pinoy Pride 23: Filipinos vs Latinos"  sa Nobiyembre 30 didto sa Smart Araneta Coliseum.

 Usa kini ka tune-up fight  ni Nietes, apan ang 31-anyos nga Filipino ring star nag-atubang og seryosong tahas  kay buot niyang pildihon si  Gutierrez, ang kanhi WBA minimumweight champion.

 "Kita mi sa mga tapes sa iyang  (Gutierrez) mga away ug makaingon gyud mi nga "tough warrior" ug "dangerous opponent" gyud siya,"  matud pa ni  ALA chief tactician Edito Villamor.

 Ang garbo sa Murcia, Negros Occidental mosuway pagpilde  ni Gutierrez sa dili pa ang gipaabot niyang "rematch" batok ni Mexican Moises Fuentes sunod tuig.

 Ang duha unang  nagsangka niadtong Marso 3 didto sa Waterfront Cebu City Hotel and Casino.

 Nahimong kontrobersiyal ang duwa  human gipakanaog ang "majority draw" nga desisyon.

 Si Nietes anaa sa katapusang hut-ong sa iyang tulo ka buwan nga training camp diin nakahuman na siya og dul-an 100  nga sparring sessions.

 "Donnie is conditioned going to this fight. He has sparred almost a hundred rounds against Milan Melindo, Rocky Fuentes and other ALA Gym fighters so I can say that he is really prepared against Gutierrez," sumala pa ni Villamor.

 Gawas ni Nietes, si Merlito 'Tiger' Sabillo  (23-0, 12KOs)  manalipod sab sa iyang WBO minimumweight belt batok ni Nicaraguan superstar Carlos Buitrago (27-0, 16 KOs).

 Mopakita sab og aksiyon ning double world championship showdown nga gipasiugdahan sa  ALA Promotions ug ABS-CBN Sports, sila si  junior welterweight prospect Jason 'El Niño'  Pagara, former two-time world title challenger AJ 'Bazooka'  Banal ug Milan 'El Metodico'  Melindo. (BANAT PALARO)