Aegis, Lexmark magsangka sa Game-1 sa CSCC E-League

 CEBU, Philippines - Magkuros na ang dalan sa magkaribal nga Aegis Vipers ug Lexmark Stallions alang sa Game-1 sa ilang "best-of-three" regular season finals sa 9th CSCC E-League basketball tournament diha sa Cebu Sports Club-Cebu gym sa Cebu Business Park.

 Nakasulod ang duha sa regular season finals human sila maghari sa ilang tagsa-tagsa ka konperensiya.

 Unang miabante ang Aegis dihang ilang gipakyaw ang duha nila ka duwa batok sa Stream Ingenyouity sa "best-of-three" aron maghari sa Northern Conference, samtang ang Lexmark mao sab ang kampiyon sa South human makalingkawas sa bangis nga Accenture Sharks sa deciding game sa ilang kaugalingong "best-of-three" series.

 Ang Aegis maghangad karon nilang Dean Junber Escalon ug Ryan Veloso, kinsa nagkumboya'g 26 puntos sa katapusan nilang duwa aron tabangan ang ilang koponan nga makasulod sa finals.

 Magsalig sab ang Lexmark sa trayo nilang Franco Angelo Cipriano, Niel Tiempo ug Siegfred Ofonda. (BANAT NEWS)