CEBU, Philippines - Magkumbati na ang mga magduduwa sa ahedres dinhi sa Sugbu sa pagsikad sa 1st Strike Open Chess Tournament karong adlawa diha sa Robinson's Cybergate.
Ang duha ka adlaw nga chessfest gipasiugdahan sa Four Central Squares, nga affiliate sa National Chess Federation of the Philippines (NCFP).
Dul-an sa P20,000 ang giandam nga ganting salapi alang sa top performers sa maong torneyo nga mosubay og 7-round Swiss system format gamit ang game point scoring system.
Ang kampiyon sa open category mobulsa og P4,000, ang ikaduha makaangkon og P3,000 ug ang ikatulo makadawat og P2,000.
Ang fourth ug fifth placers gantihan og P1,000 matag usa, samtang ang top female finisher makadawat og P500 bonus.
Sa kiddies (14-under) division, ang top three makadawat og P3,000, P2,000 ug P1,000, samtang ang ikaupat ug ikalima ug ingon man ang top female player makaangkon og P500 matag usa.
Aduna kini registration fee nga P150 alang sa kiddies ug P200 alang sa mga partisipante sa open category.
Alang sa dugang pang mga kasayoran, niadtong interesadong mosalmot mahimong mokontak ni FIDE Arbiter Felix Poloyapoy Jr. sa 0933-6642958 o di ba ni tournament director Eduard de la Torre sa 0932-8622010 o Glenda Tatoy sa 0908-4860641.
Ang kalihukan gidalit sa Four Central Squares uban sa suporta sa Robinson's Land Corporation pinaagi sa ilang assistant marketing communications officer Ms. Avigael C. Manigo. (BANAT NEWS)