CEBU, Philippines - Wala mokompiyansa ang Davies Paints ug Amchels diin ilang gilubong ang tagsa-tagsa nilang kaatbang aron maoy magsangka sa kampiyonato sa Bosconian Basketball Club's Don Bosco Cup 2013 niadtong Domingo didto sa Don Bosco Technology Center (DBTC) gym sa barangay Punta Princesa, ning siyudad.
Si Celso Colegado mitusak og 16 puntos alang sa Davies Paints nga mitagak sa Bullvets '94 sa iskor nga 66-54, samtang ang Amchels mipalagpot sa Batch '98 sa iskor nga 63-43.
Gumikan niini, ang Davies Paints ug Amchels maoy mag-ilog sa korona pinasubay sa "best-of-three" nga sugdan sa Nobiyembre 10.
Ang Davies Paints mipintal lang og usa ka lugas paghuman sa first period, 15-14, apan padayon nilang gidabodabohan ang Bullvets sa mosunod nga tulo ka kuwarter aron maangkon ang luna sa finals.
Sa laing duwa sa semifinals, ang Amchels mipauwan og mga puntos gikan sa pagsugod hangtod nahuman aron lumsan ang Batch '98.
Nabiyaan ang Amchels og tres puntos, 11-14 paghuman sa unang 10 minutos sa duwa, apan milusad kini'g 21-6 run aron mailog sa halftime sa iskor nga 32-20.
Namintenar sa Amchels ang ilang maayong duwa sa final half aron molansang og 20 puntos nga kadaugan.
Si Erick Gica maoy nangu sa Amchels nga miugbok og 16 puntos, samtang si Gandi Mahinay mirehistro og 12 puntos alang sa pilderong Batch '98. (BANAT NEWS)