CEBU, Philippines - Pakyas si multi-titled Cebuano rider Jon-Jon Adlawan pagdominar sa pro open category sa Ormoc leg sa Kopiko Astig 3-in-one Supercross National Series sa miaging adlaw didto sa Ormoc City racetrack.
Si Adlawan, kinsa mihimo'g "back-to-back" nga kadaugan didto sa Cagayan de Oro ug Ilo-ilo niadtong Agosto ug Septiyembre, natagak sa ikatulong dapit sunod nila ni Rhowell Mangosong sa Davao City ug Phl No.1 rider Glenn Aguilar.
Ang Cebuano rider nga si Jubenile Abellar ug Jovie Saulog maoy mikompleto sa top five finishers.
Ang kadaugan motabang unta ni Adlawan pag-ilog sa No.1 sa ranking nga gihuptan ni Aguilar ug mopadaku sa iyang kahigayonan nga mahimong "Rider of the Year" sa maong 12 leg series.
Sa pro lites class, si Aguilar midaog batok ni Mangosong, samtang si Aguilar nagpabilin sa ikatulong dapit.
Si Ted Conde maoy naghari sa intermediate class, samtang si Jacob Orber sa novice open production. Si Felson Baculpo milangkat sa underbone trophy, samtang si Janelle Saulog sa women’s class.
Lain pang midaog sa tagsa-tagsa nila ka kategoriya mao sila si Jaypee Glenn Gaid (peewee 50cc) BJ Pepito (peewee 65cc), McLean Aguilar (mini), Jed Luna (open enduro), Jing Leongson (veterans A), Ayen Ledesma (veterans B) ug James Roy Doroy (veteran C). (BANAT NEWS)