CEBU, Philippines - Nakatilaw na sab og daog ang team Pajo sa ilang duwa batok sa Sambag Nangka, 68-55 sa Seniors division sa nagpadayong aksiyon sa Ibabao Estancia "3rd Barangay Captain's Cup" basketball tournament niadtong Huwebes sa gabii didto sa bag-ong multi-purpose gym sa nahisgutang barangay sa dakbayan sa Mandaue.
Misalida dayon sila si Dexter Ajos ug Sheldon Gahi diin nagkumboya sila og 11 puntos aron patilawon ang Pajo og 13 puntos sa halftime, 34-21.
Si Ajos miligwat og 15 puntos, apan si Narry Villahermosa maoy nangulo sa Pajo nga miugkat og 17 puntos, gilamasan og tulo ka three-point shots, samtang si Gahi miambit og siyete puntos.
Gawas pagpamupo'g mga puntos, gidominar sab sa Pajo ang rebounding department sa second half aron morehistro sa labing daku nilang labaw nga 24 puntos sa fourth quarter, 59-35.
Nakahimo unta og mga steals ang Sambag Nangka, apan maglisud sila pag-iskor tungod sa kahigpit sa depensa sa Pajo.
Bugtong paglaum lang sa Sambag Nangka mao ang pagkitkit sa makabungog nga labaw.
Duha ka players miiskor og double figures alang sa Sambag Nangka, kinsa wala gyud makatagamtam og labaw gikan sa pagsugod hangtod nahuman ang duwa.
Ang tinuig nga liga gipaluyohan sa Ibabao Estancia Barangay Council ubos sa liderato ni Brgy. Capt. Carmelino 'Jun' del Mar Jr. ug sa SK nga gipangulohan sa ilang tsirman nga si Jake E. del Mar.
Ang committee in-charge sa maong duwa mao si konsehal Diosdado 'Jun' Egay Jr. uban nila ni Venrhey Calderon, Eldie Soco, Tony Suliva ug Yong Cortes
PUNTOS MATAG USA
PAJO (68) - Villahermosa 17, Ajos 15, Venenoso 8, Gahi 7, Decon 7, Cabahug 6, Mallorca 5, Cortes 3
SAMBAG NANGKA (55) - Mesa 16, Mendoza 10, Torion 8, Lucernas 7, Cortes 6, Abayon 6, Labastida 2