Duna gyu'y matumba

CEBU, Philippines - Miulbo dayon ang tensyon sa unang panagkita  nilang ALA Boxing Gym stalwart Genesis 'Azukal' Servania ug sa iyang Panamian challenger Rafael 'El Torito' Concepcion.

 Atol sa ilang panagkita, init kaayo ang ilang panagtinagdanay ug    nagbinaharay pa.

 Si Servania (22-0, 8KOs) manalipod sa iyang WBO Intercontinental super bantamweight title batok ni Concepcion (18-6, 8KOs) sa main event sa "Pinoy Pride XXII: The Revenge" fight card karong Sabado sa  gabii diha sa Waterfront Cebu City Hotel and Casino.

 Human masayri nga pakatulgon siya ni Concepcion  ibabaw sa ring,  ang undefeated ALA fighter nga si Servania, mihudlat sab nga iyang pakamangon ang bisitang boksidor nga si Concepcion.

 "Ingon siya nga pakatulgon ko unya wa koy power, pero tan-awon nato sa away kay basin og mobalik niya ang iyang gisulti," matud pa ni Servania atol sa final press conference kagahapon didto sa Aegean Room sa Waterfront Hotel.

 Tuyo ni Servania nga  mobawos ni Concepcion, kinsa maoy nakababag  sa  gidamgong  world title sa iyang stablemate nga si AJ 'Bazooka' Banal.

 Si Concepcion mi-KO ni Banal sa round 10 atol sa ilang WBA super flyweight bout niadtong  2008 diha sa Cebu Coliseum.

 Nanganti si Concepcion nga dili niya paabton sa round 10 si Servania ug iya kining tumbahon.

 "He is an easy opponent. I knocked (AJ) Banal in the 10 round but for Servania, I will give him less than 10 rounds. I am giving him a favor by knocking him out early so he will not take too much punishment during our fight," matud ni Concepcion.

 Sa supporting main event, laing undefeated ALA warrior nga si ‘'King' Arthur Villanueva (23-0, 13KOs) makigsangka batok ni  Mexican Edgar 'Chololo' Martinez (16-7, 10KOs) alang sa WBO International super flyweight title.

 Mobida sa undercard mao si kanhi IBO bantamweight challenger Roli 'Zuma' Gasca (20-4, 5KOs) batok ni Indonesian Lande Olin (11-4, 7KOs), samtang si Mark Vincent 'Machete' Bernaldez (11-0, 7KOs) makigsinukmagay ni Thai Khunkhiri Wor Wisaruth (10-5, 5KOs).

 Ang official weigh-in himuon karong alas-11 sa buntag diha sa Active Zone sa Ayala Center-Cebu. (BANAT PALARO)