Maroon, Green gisubha'g daog sa SRP Sunday Club Christmas League 2013 Yoyo R. Abayan
CEBU, Philippines - Gisugat og daog ang team Maroon human makaikyas gikan sa makutas nga duwa batok sa defending champion Blue team, 64-63 sa unang adlaw sa SRP Sunday Club Christmas League 2013 basketball tournament nga gibuksan niadtong Domingo sa buntag didto sa San Roque Parish gym sa barangay Subangdaku, Mandaue City.
Miugbok og 19 puntos si Marcial Marturillas, samtang si Benito Aton miugkat og 13 puntos alang sa Maroon nga maoy midiktar sa duwa human moposte'g dos puntos nga bentaha sa halftime, 39-37.
Ligas na ang duwa sukad niadto, gani makawalo ka higayon nga nagtabla sa second half. Ang Blue team katapusang nakatabla, 60-all sa nahabiling 25 segundos pinaagi sa three-pointer ni Buddy Alesna.
Si Marturillas miposa og tulo ka sunod-sunod nga puntos aron hatagan ang team Maroon og tres puntos nga labaw, 63-60 sa katapusang 15 segundos. Nakahigayon sa pagsikit ang Blue team, 63-64 sa triple ni Alesna, apan didto ra kutob ang gipakitang katakus kay nahutdan na sila sa oras.
Si Amay Day miamot og 10 puntos alang sa Maroon nga adunay 1-0 win-loss record.
Ang napildeng Blue team gipangulohan ni three-point artist Ramon Fontanosa, kinsa miburak og 14 puntos, gisundan ni Fernando Anghay sa iyang 12 puntos ug Arnel Colanse nga adunay 11 puntos.
Sa pasiunang duwa, gisubhan sab og daog ang Green team pinaagi sa paglubong sa Red team, 66-54.
Gipangulohan ang kadaugan sa Green ni Larry Lauron, kinsa mipabuhagay og 14 puntos ug nilang Toto Cabrillas ug Titing Bacunawa nga parehong misaksak og 12 puntos.
Si Mariano Dialogo mitikdol og 15 puntos, samtang si Ruben Flores mitimang og 13 puntos aron pangulohan ang nagkadugo nga Red team.
Walo ka teams ang misalmot sa Christmas League 2013 sa SRP Sunday Club ubos sa liderato sa ilang presidente nga si Rom Castañeda.
Kaabag ni Rom Castañeda nga modumala sa SRP Sunday Club mao sila si Jun Atillo (vice president), Ruben Flores (secretary), Glenn Castañeda (treasurer), Arnold Aventajado (auditor) ug Nonoy Amora ug Melio Colina (PROs).
Ang torneyo gidumala ni league commissioner Monching Menaling.
PUNTOS MATAG USA
Unang duwa:
GREEN (66) - Lauron 14, Cabrillas 12, Bacunawa 12, Abaño 6, Ipili 6, Rico 4, Andrew 4, Pon 3, Feniza 2
RED (54) - Dialogo 15, Flores 13, Labastida 8, Ramirez 7, Narte 6, Pestaño 3, Obihada 2
Ikaduhang duwa:
MAROON (64) - Marturillas 19, Aton 13, Dy 10, Dindo 6, Castro 6, Turbo 6, Cariño
BLUE (63) - Fontanoza 14, Anghay 12, Colanse 11, Dandan 8, Alesna 6, Orendain 5, Povadora 3, Lipogpog 2, Medio 2
- Latest
