CEBU, Philippines - Miabot na dinhi sa Sugbu si veteran Panamian fighter Rafael 'El Torito' Concepcion ug nagdala kini'g ngil-ad nga sinugatan ngadto sa iyang kontra nga si ALA Gym fighter Genesis 'Azukal' Servania.
Si Concepcion mituyo pag-anhi aron harungon si Servania sa main event sa "Pinoy Pride XXII: The Revenge" fight card karong Sabado diha sa Pacific grand ballroom sa Waterfront Cebu City Hotel and Casino.
Ang duha magsangka alang sa WBO Intercontinental super bantamweight title.
Uban sa iyang trainer nga si Rigoberto Garibaldi, si Concepcion miabot sa Sugbu niadtong Domingo sa buntag ug mipadangat og dili maayong mensahe ngadto ni Servania.
Si Concepcion mihulagway ni Servania nga huyang nga boksidor ug hinay kaayo'g kumo.
"I have fought better boxers than Servania has faced," matud pa ni Concepcion. "He doesn’t have punching power."
Si Concepcion kinsa mipilde usab ni former ALA world title challenger AJ 'Bazooka' Banal, adunay rekord nga 18-6, 8KOs, samtang si Servania adunay 22-0, 8KOs.