Ang tawo panahon sa katalagman
Usa ka makalilisang nga kasinatian ning semanaha ang atong naagian tungod sa 7.2 magnitude nga linog niadtong Oktubre 15.
First and foremost, isip usa ka tigbalita nga nag-cover sa police, defense ug safety, bisan pamilyado kita kabahin na sa kinabuhi
nato ang pagresponde sa mga katalagman ug emergencies, aron mokober ug mapaabot sa publiko ang mga kasayoran sa panghitabo.
Apan dili ikalimod nga bisan sa parehas natong pirme nang makakita og mga dili kaayo komon nga mga panghitabo kun itandi sa
uban o kinabag-an, moabot gihapon sa atua ang kahadlok ug kakuyaw.
Didto ako sa third floor sa Doña Luisa Building sa may Fuente Osmeña diin mahimutang atong DyRC Radyo Calungsod nga
atong gialagaran ug bag-ohay pang nahuman ang atong alas-7 nga Balita Numero Uno. Samtang nag-programa na si Prof. Nestor Ramirez
uban sa iyang partner nga si Rachelle Sarmiento sa ilang programang "Dial Your Opinion" nabatyagan ang kalit nga pag-uyog sa tibuok
building.
Tungod kay sa panahon nga nagtungha pa kita sa kolehiyo naka-training man kita og "Disaster Management" sa Philippine
National Red Cross kaniadto awtomatikong mi-take over ang atong nakamahoan kun unsay buhaton panahon sa linog.
Kay didto man ko sa lobby, wa na ko mo-attempt og sud aron mopasilong sa lamesa, misikit na lang ko sa dakung haligi samtang
nagpaabot nga molurang ang pagtay-og.
Apan sahi ra kaayo sa atong naandang mga linog nga molanat lang og tagtulo ngadto sa lima ka segundos ang pagtay-og,
nagkakusog ug daw mireklamo na ang kongkretong buildings kay naglagatak na man ang palibot ug nangatagak ang mga abog ug tipaka
sa bungbong.
Didto daw nahurot ang reserba nakong "calmness" ug nakasinggit nako sa atong News Director nga si Ramil Paican (ka-estorya
nako niadtong tungora) nga manganaog na lang mi.
Samtang nag-uyog ug lagatak ang palibot ug nangatagak ang mga glass walls sa agianan nagdagan-dagan mi pagawas sa
building.
Nagpasalamat ko sa Kahitas-an nga luwas ming nakagawas kauban si The Freeman/ Banat News police reporter kinsa nag-alagad usab sa
DyRC nga si Ria Mae Booc, King Fernandez (technician) ug sila si Prof. Ramirez ug Sarmiento luwas nga nakagawas sa building padung sa
Fuente Osmeña Rotunda.
* * *
Kun kita dinhi sa Sugbu nakasinati niadtong mga tungora og grabeng kalisang, unsa na kaha ang atong kaigsuonan didto sa
Bohol.
Ang Cebu ug uban pang mga dapit ang mibati og kaguol sa gidangatan sa Bohol nga dunay kapin 160 ka mga nakalas.
Panahon karon nga ato silang tabangan sa ilang kagul-anan tungod kay ning mga panahona mas gikinahanglan sa atong mga
kaigsuonan ang atong paghigugma.
Masukod ang tawo panahon sa kalisud ug kaguliyang. Mao kini ang hinungdan nga ang tawo nabutang sa kinaibabwan sa
tanang mga mananap sa kalibotan, ang makamaong maluoy ug mobati sa isi’g kaingon.
Daghang mga drop centers nga modawat og mga relief goods ug hinabang karon nga gituyo aron tabangan ang mga
kaigsuonan nato sa Bohol.
Ang The Freeman Foundation Inc.; Damayan sa Philippine Star; ang University of the Visayas, Halad Kapamilya, GMA Kapuso
Foundation ug ang DyRC Operation Tulong ug MBC Network dunay gilusad nga mga relief operations nga mahimo ninyong katunolan sa
mga hinabang.
Ang nahitabo niadtong Martes daw usa ka pahinumdom kanato nga madatu man o ma-pobre patas ang bation panahon sa
katalagman, tungod kay kita tawo.
* * *
PAGTULON-AN: Ang pagtabang sa nanginahanglan bisan tunga-tunga sa kalisdanan ug kalamidad maoy nagpalahi sa tawo
sa ubang kinabuhi sa kalibotan.
PASUPOT: Nagsige pa ang aftershocks atol ning pagsulat.
- Latest
