CEBU, Philippines - "Double victory" maoy tuyo ug tumong sa Aegis People Support sa finals sa 2013 Spike Sports Volleyball League-Innodata Skywalkers Cup nga ipahigayon ugma diha sa Innodata multi-sport court sa dakbayan sa Mandaue.
Ang Aegis People Support makigtigi sa host Innodata sa men's division championship, samtang ang ilang female counterparts makigsangka sa Convergys.
Miabante ang Aegis spikers sa final round human gitagak ang ePerformax, 25-12, 25-18, 25-22 sa semifinals, samtang ang Innodata mipukan sa Convergys TGU, 25-20, 25-13, 25-18.
Sa women's semis, ang Aegis mipalagpot sa Calltek, 25-20, 25-16, 25-16, samtang ang Convergys mipulbos sa host Innodata sud sa upat ka sets, 16-25, 25-23, 25-19, 25-8.
Sa dili pa ang kampiyonato, ang ePerformax makigharong batok sa Convergys-TGU alang sa ikatulong dapit sa men's division, samtang ang Innodata makigsangka sa Calltek sa women's class.