Green season

UV sa CESAFI, La Salle sa UAAP. Ang University of the Visayas (UV) Green Lancers, ang usa ka manggugubat nga nagsakay og kabayo bitbit ang dakung bangkaw, samtang ang  De La Salle University (DLSU) Green Archers, usa ka hanite sa pana.

 Dinhi halos magkapareho ang ilang monickers ug medyo pupareha gyud ang tuno -- Lancers ug Archers. Kun ato lang kahang ingnon Green Lan-Chers.

 Daw sa nakasuwat nang daan sa palad nga ang mabiyaan sa series maoy modaog sa korona. Ang deperensya lang sa CESAFI kay "best-of-five" series ang finals, apan ang UAAP "best-of-three" lang.

 Kahinumdoman, unang midaog ang SWU Cobras ug una sab midaog ang UST Tigers. Sulagma lang nga nakatabla ang Lancers sa 2-2 ug nakatabla ang Archers sa 1-1. Midaog ang Lancers og dos puntos sa deciding game, 64-62 ug dos puntos sab nadag-an sa Achers sa deciding Game-3, 71-69 sa overtime.

 Ang dunay mga hait nga hinagiban sama sa Lancers ug Archers, mibuno sa mga mananap -- Cobras ug Tigers nga parehong mokamang. Maong nakaingon ko nga Green Season kay parehas sab og set sa uniporme ang UV ug La Salle. Ang ilang light uniform puti ug may markang green, samtang ang ilang dark uniform nga green may markang puti.  Duna pa koy idugang nga hayan makapahimuot sa mga fans sa Lancers ug kini kalabot na ni coach Elmer 'Boy' Cabahug ug Felix 'Donbel' Belano.

 Human sa gihimong victory party/press conference sa UV Green Lancers didto sa opisina sa UV president Eduardo R. Gullas ug Lancers’ team manager Samsam Gullas, misantop sa akong alimpatakan kining maong simbolo nga naglamgibit nilang Cabahug ug Belano.

 Aron paghatag og bulok, ato kining gamitan og gitawag nga "algebraic expression" nga EC(9)+FB(1)=10.

 Ako kining hubaron aron sab kamo makasabot, malingaw ug makabantay nga husto ang akong obserbasyon apan kining tanan, ako lang kaugalingon imbento ug wala magpasabot nga mao gyud kini ang nasubay sa kapalaran.

 Makaingon ako nga wala gyud maglagyo silang coach Cabahug ug coach Belano bisan adto nato subayon sa ilang ngalan ug sa apelyido.

 Atong sugdon sa initials sa ilang ngalan. Si Elmer nag-una sa alphabet ni Felix, apan sa apelyido, nag-una sab ang Belano sa Cabahug. Si coach Cabahug may siyam ka korona sa CESAFI, samtang usa pa lang ang nadaog ni coach Belano aron mahimong 10 ka titulo. Ang Elmer ug ang Felix parehong lima ka letra busa 10. Ang Belano ug Cabahug kun sumpayon adunay 13 ka letra. Di ba ika-13 man karon nga season sa CESAFI?

 Mga suki sa SPORTSgab, kini silang Cababug ug Belano parehong mga ex-PBA star ug pareho sab mga kanhi player sa MBA. Si Boycabs shooting guard, si Donbel pointguard. Si Cabahug nagduwa kanhi sa Alaska, samtang si Donbel sa Talk N Text. Si Cabahug nagduwa sab kanhi sa Pangasinan Waves ug si Belano sa Davao Eagles ubos ni coach Francis Rodriguez diin siya maoy bugtong player sa Pilipinas o bisan pa tingali sa tibuok kalibotan nga nakahimo’g quadruple double (17 points, 11 rebounds, 11 assists ug 10 steals). Didto nahimugso ang angga nga "Mr. Quadruple Double" ug namugna ang jersey number 42.

* * *

 MISCELLANEOUS. I attended the Seminar on Labor & Other Related Laws at the Cebu City Hall last Saturday, October 12 from 8 am to 3pm conducted by Mr. Edmund Mirasol, Regional Director of the National Conciliation and Mediation Board (NCMB)- Region 7. Get well soon Archbishop Ricardo Cardinal Vidal. The Cebuanos are praying for your good health.