Roscan segurado na sa playoffs

CEBU, Philippines - Yanong gipukan sa ROSCAN Lines ang Customs Portmen sa iskor 108-84 kaniadtong Huwebes atol sa 1st BOC-CIPU basketball tournament didto sa Benedicto College gym sa dan A.S. Fortuna sa dakbayan sa Mandaue.

Sa laing duwa, nakasagunson og tulo ka daog ang Global Carrier ug ang labing uwahi nilang biktima mao ang PCB Brokers kinsa ilang gilatos og 19 puntos, 86-67.

Tungod sa maong kadaugan, segurado nang moduwa ang 3-3 nga ROSCAN Lines ni Roy Canillas sa playoff alang sa ika-upat nga luna sa semifinals diin ilang ikasangka ang Ynah Brokers.

Daan nang gitag-an ni Canillas nga duna gihapon silay dakung purohan nga moabante sa semifinals human sa ilang kapildehan batok sa Global Carrier kaniadtong Oktubre 8. Maoy gikuhaag sukaranan ni Canillas  ang ilang nahiagoman sa miaging tuig tungod kay matag higayon nga mag-agi sila'g krusyal nga pilde unya modaug sunod duwa, molahos sila sa semifinals.

Si Jerry Singson maoy nangu sa ROSCAN Lines sa iyang 28 puntos samtang parehong mibahug og 14 puntos silang Ferdie Sigue ug Jim Villa.

Lima ka players sa Portmen ang mihimo'g double figures nga naglakip kanilang Boodie Monteño ug Jingjing Rama.

Sa laing bahin, mikabkab og 25 puntos ang kanhi CIT Wildcats forward Ramil Aniñon aron pangulohan ang Global Carrier samtang miburak og 20 puntos silang Kenneth Maningo ug Cris Manulat. Miabuno pa gyud si Elmer Miscala og 11 puntos alang sa 4-2 nga Global Carrier.

Ang Global Carrier mikamang na ngadto sa solong ikatulong pwesto sunod sa MJDL Brokers ug Rollway-Petracorta.

Upat lang ka players sa PCB (0-6) ang nakaiskor og pulos isla mihakot og double figures diin may 21 puntos si  Alex Pangan, midugang og 16 puntos si Yulo Arevalo ug miamot ug 14 ug 11 puntos matag usa silang Alex Plando ug Nick Velasquez.

Puntos matag usa:

First Game:

ROSCAN Lines (108) — Singson 28, Sigue 14, Villa 14, Boniao 9, Manlosa 8, Dellosa 8, Bensi 7

Customs Portmen (84)— Reyes 18, Monteño 14, Laraga 14, Rama 11, Gacilos 10, Cañete 6, Remonde 2

Second Game:

Global Carrier (86)—  Aniñon 25, Maningo 20, Manulat 20, Miscala 11, Cabillada 5, Cedeño 3, Tandas 2

PCB Brokers (67)— Pangan 21, Arevalo 16, Plando 14, Velasquez 11 (SPORTS BANAT)