Gipilde ni Bradley pinaagi sa split decision

CEBU, Philippines - Gigamit ni WBO welterweight champion Timothy Bradley ang iyang utok human niya gilupig sa diskarte ibabaw sa ring ang Mexican boxing legend nga si Juan Manuel Marquez pinaagi sa split decision kagahapon didto sa Las Vegas.

Si Bradley migawas nga mas iglas ug lihay itandi ni Marquez aron makapasud og mas daghan nga kinumo nga maoy mikumbinsir sa mga hurado nga ihatag kaniya ang daog.

Dili hinuon kaayo kulbahinam ang away tungod kay nagpanagana si Bradley pakigbinayloay og kumbinasyon ni Marquez maoy giila nga mas delikado tungod usab sa knockout power niini, apan mipatigbabaw gihapon ang Amerikanong boksidor tungod kay siya ang midaog sa pinuntosay.

Human sa dose ka hugna nga binukbukay, si Bradley midaog sa duha ka hurado 116-112, 115-113, samtang si Marquez nakakuha sa tando sa usa ka hurado 115-113.

“I beat a great champion," matud pa ni Bradley. “Marquez couldn't touch me. I gave him a boxing lesson."

Sa maong kadaugan, nagtuo si Bradley nga napamatud-an na niya nga dili taghap ang iyang kontrobersyal nga split decision nga kadaugan batok sa kanhi Filipino boxing icon nga si Manny Pacquiao niadtong miaging tuig.

Sa iyang bahin, ang 40-anyos nga si Marquez kinsa nabantayan sa kadaghanan nga dili na susama ka paspas ug kakusug itandi sa katapusan niyang kadaugan batok ni Pacquiao niadtong Disyembre, nagtuo nga siya ang angay nga midaog sa away.

"I came to win. I felt I did win," matud pa niya. “The judges took it away. You don't have to knock out a guy to win. I've been robbed six times in my career. I clearly won the fight."

Si Bradley pabilin nga walay pilde sud sa 31 niya ka away ug posible nga ika-rematch ni Pacquiao sa umaabot, samtang si Marquez kinsa way seguro kun hingpit na ba nga moretiro nakahiagum sa iyang ikapitong pilde sud sa iyang 63 ka away. (SPORTS BANAT)