CEBU, Philippines - Manghod ni WBO Asia-Pacific super bantamweight champion Genesis 'Azukal' Servania mopakita sa abilidad sa laing edisyon sa ALA Promotions and Cobra Energy Drink "Tunay na Lakas Boxing" karong gabii didto sa Bays Center sa Bacolod City.
Si Rolando Servania (4-0, 1KO), ang kanhi amateur standout mosuway pag-inat sa iyang winning streak sa iyang pakigharong ni Marlon Macayan (1-0) sa usa ka double-header main event.
Ang taga-Bacolod City nga si Servania lab-as pa sa iyang six round split decision nga kadaugan batok ni Jonas Sultan niadtong Hulyo 21 didto sa Bacolod.
Paningkamotan ni Servania nga makahimo'g impresibo nga daog aron madasig ang iyang maguwang nga si Genesis, kinsa magatubang og lisud nga sangka batok ni Panamanian veteran Rafael 'El Torito' Concepcion karong Oktubre 26 sa the main event sa Pinoy Pride 22 diha sa Waterfront Cebu City Hotel and Casino.
Gawas ni Servania, moaway usab ang laing ALA prospect nga si Juren Labordo (10-0, 6KOs) nga mosukod sa abilidad ni Marzon Cabilla (9-9, 4KOs) sa Valencia, Bukidnon.
Sa katapusan niyang sangka, si Labordo nagkinahanglan lang og usa ka round aron madispatsar si Ricky Sabia niadtong Hulyo 21.
Mokompleto sa fight card mao ang sangka nila ni Roy Sumugat batok Rolly Llino, John Rey Melligen batok Arnel Acebuque, Alvin Sibugan batok Glen Cantiveros ug Ruben Sibugan batok Bryan Johnson. (BANAT PALARO)