CEBU, Philippines - Makaangkon na usab og laing kahigayonan si ALA Boxing Gym fighter Roli 'Zuma' Gasca (20-4, 5KOs) nga mahimong world champion sa dihang makigsangka siya
batok ni Indonesian warrior Lande Olin (11-4, 7KOs) sa undercard sa "Pinoy Pride XXII: The Revenge" karong Oktubre 26 diha sa
Waterfront Cebu City Hotel and Casino.
Ang boxing extravaganza nga gipasiugdahan sa ALA Promotions ug ABS-CBN Sports bidahan ni WBO Asia-Pacific super
bantamweight king Genesis Servania, kinsa modepensa sa iyang bakus batok ni Rafael 'El Torito' Concepcion sa Panama.
Ang 24-anyos nga si Gasca nahimong OPBF super bantamweight champion human siya midaog pinaagi sa "majority decision"
batok ni Japanese Hiromasha Ohashi niadtong Agosto 7, 2011 didto sa Aichi, Japan.
Apan wala magdugay ang bakus sa iyang mga kamot human siya napilde sa una niyang title defense ngadto ni Japanese
challenger Yukinori Oguni niadtong Nobiyembre sa maong tuig didto gihapon sa Japan.
Nakakuha usab og kahigayonan ang taga-Barili nga si Gasca nga mahimong world champion human siya miaway alang sa IBO
title, apan nakasugat siya og laing sakit nga kapildihan batok ni Alexander Bakhtin sa Russia sa miaging tuig.
"Gasca is a fighter who shows a lot of talent and a high I.Q inside the ring. We still believe that he has the potential to be a
world title challenger in the future," matud pa ni ALA Promotions President and CEO Michael Aldeguer.
"This will be crucial for him to see if he still has what it takes to continue what he once started."
Sa laing bahin, laing mga ALA boys nga sila si Mark Vincent 'Machete' Bernaldez ug Jessel Mark 'Magnifico' Magsayo ang
mopakita usab sa ilang abilidad sa undercard.
Si Bernaldez (11-0, 7KOs) makigsinukliay og kumo ni Thai Khunkhiri Wor Wisaruth (10-5, 5KOs), samtang si Magsayo (3-0,
2KOs) mosukod sa katakus ni Hagibis Quiñones. (BANAT NEWS)