CEBU, Philippines - Mipahungaw sa ilang kainit ang Bullvets '94 gikan sa pagsugod hangtod paghuman aron makaging ang DBUFC, 89-54 sa nagpadayong aksiyon sa Bosconian Basketball Club's Don Bosco Cup niadtong Domingo didto sa Don Bosco Technology Center (DBTC) gym sa Brgy. Punta Princesa, ning siyudad.
Sa lain pang mga aduwa, si Ron Mabanto mipabuto og 25 puntos alang sa Batch '98 nga mipilde sa Batch 2009 sa iskor nga 53-45, samtang ang Plas naka-eskapo bitbit ang 56-54 nga kadaugan batok sa Batch '95.
Human magkatabla, 29-all sa halftime, ang Batch '98 nagsalig sa ilang kompas nga opensiba sa final half aron daruhon ang Batch 2009.
Ang Plas sa laing bahin, nakabawi gikan sa bugnaw nilang sugod ug nanginit sa ikaduhang kuwarter aron makuha ang sikit nga kadaugan batok sa Batch '95.
Nabiyaan ang Plas og nuybe puntos human sa unang 10 minutos sa duwa, 10-19, apan mi-rally kini sa second period aron moabante og usa ka lugas, 28-27 sa halftime. Ang duha nagsinukliay og mga puntos, apan ang Plas maoy maoy mipatigbabaw sa duwa aron maangkon ang dos puntos nga kadaugan.
Napulo ka koponan ang mipakita'g asiyon sa maong torneyo nga gipasiugdahan sa Bosconian Basketball Club ubos sa liderato sa ilang presidente nga si Engr. Jonathan Reyes.
Ang ubang BBC officers naglakip nila ni Archt. Duane Dale Anino (vice president), Atty. Kenneth Kern Sesante (secretary), Omar Nacorda (treasurer) ug Ian Castrodes (auditor). (BANAT BALITA)