CEBU, Philippines - Bisan og wala mamuntos og maayo ang mga pambato gikan sa topseed sa juniors division Sacred Heart School-Ateneo de Cebu (SHS-AdC) Magis Eagles, nakahimo gihapon ang West All-Star paglubong sa East All-star nga gipalig-onan sa mga batos gikan sa Cebu Eastern College (CEC) Dragons ug University of the Visayas (UV) Baby Lancers aron modaug sa juniors divison, 104-82 sa CESAFI All-Star Game kagahapon didto sa Cebu Coliseum.
Ning pagsuwat, nagpadayon pa ang slam dunk contest ug sundan dayon kini sa East vs. West All-Star Game sa seniors division.
Silang Arnie Padilla ug Lucky Ecarma sa Magis Eagles parehong mihimo'g double figures sa ilang 12 ug 10 puntos matag usa apan ang nahimong MVP sa maong duwa mao ang sinaligan sa University of Cebu (UC) Webmasters nga si Justine Dacalos kinsa miposa og 14 puntos.
Parehong midugang og 11 puntos matag usa silang Paul Galinato ug Carlo Ortega sa University of San Carlos (USC) Baby Warriors.
Si Jessie Aloro, ang pambato sa Cebu Institute of Technology-University (CIT-U) maoy nangu sa East All-Star sa iyang 20 puntos. ug si John Carl Escalona sa Baby Lancers midugang og 11 puntos.
Sa laing bahin, gipamatud-an ni Miguel Plata, ang Davaoeno rookie sa USC Warriors nga kung moigo siya'g adunay bantay, mas samot na kung wala'y modepensa aron mahimong bag-ong hari sa 3-Point Shootout sa iyang 13 puntos. Sa elimination diin ang top four maoy miabante nga naglakip sa iyang teammate nga si Victor Rabat, Jan Michael Auditor sa UC ug Michael Smith sa USPF, miabante sa finals human siya mo-iskor og 13 puntos.
Si Rabat maoy nag-una sa elimination sa iyang 20 puntos, si Auditor may 14 puntos ug si Smith may 11 puntos.
Ang natagak mao silang Monbert Arong ug Mark Jayven Tallo sa SWU (10 puntos), Noel Villanueva sa UC (9 puntos) James Regalado sa USJR ug Venhur Villamor sa UV (8 puntos) ug si Arvin Kim Gomez sa UC (7 puntos).
Puntos matag usa:
West (104)--- Dacalos 14, Padilla 12, Galinato 11, Ortega 11, Ecarma 10, Menina 8, Huang 7, Igna 6, Jaboneta 5, Divinagracia 5, Suelto 4, King 4, Paon 3, Laguyo 2, Del Campo 2.
East (82)--- Aloro 20, Escalona 11, Manzo 9, Espina 6, Tan 6, Roa 6, Limitares 5, Canete 5, Bulibuli 4, Obado 3, Berdera 3, Nazareno 2. (BANATSPORTS)