CEBU, Philippines - Pagtuyok na lang sa pipila ka adlaw ang gihuwat aron masugdan na sa hingpit ang labing unang Lower Tipolo Homeowners Association Incorporated (LTHAI) Fiesta League basketball tournament nga gikatakda karong Domingo diha sa open court sa CD Seno extension road, dakbayan sa Mandaue.
Kini agi'g dugang mga kalingawan alang sa kapistahan sa ilang mahal nga patron Saint Vincent de Paul nga saulogon karong Septiyembre 21.
Hugtanon kining gipaluyohan sa Tipolo Barangay Council ubos sa liderato sa maabtikon ug kugihang Brgy. Capt. Restituto 'Resty' Villanueva.
"Mosuporta ta ani nga kalihukan kay alang man ni sa kaayohan sa mga tawo sa barangay," matud pa ni Villanueva.
"Tuyo ug tumong sab sa kalihukan ang pagdani sa mga kabataan sa pagduwa'g basketbol ug mahilayo sa mga dautang bisyu sama sa ilegal nga drugas. Pagdiskubre og bag-ong mga talento nga molangkob sa Tipolo Selection team nga morepresentar sa barangay alang sa mga dagkung liga sa Mandaue sama sa Mayor's Cup ug kahiusahan," dugang pa ni Villanueva.
Sa iyang bahin, si league commissioner Al Sapanta miingon nga ang torneyo adunay upat ka kategoriya ug kini mao ang midget, juniors, seniors open ug ang 40-above.
Sugdan ang kalihukan pinaagi sa parada sa tanang partisipanteng koponan sa alas-3 sa hapon. Isunod dayon ang hamubo nga programa diin si Brgy. Capt. Villanueva mohatag sa iyang mahinungdanong mensahe ngadto sa mga atleta.
Gipaabot sab motambong ang iyang mga konsehales nga pangulohan ni former city councilor ug kasamtangan No. 1 barangay councilor Copoy Villanueva, McCollins 'Makol' Villanueva, Boboy Bacatan, Ramon Alimpangog, Theodore Cortes, Eric Estrera ug Cecile Semense.
Molamas sa opening ceremonies mao ang pagpili sa "best muse" ug "best in uniform."
Ang Sangguniang Kabataan ubos ni SK chairman Joy Maris 'Kala' Villanueva mosuporta sab sa maong liga diin sila ang mohatag sa mga ganting salapi ngadto sa top three teams sa matag kategoriya. Ang premyo niini kuhaon gikan sa ilang panudlanan. (BANAT NEWS)