CEBU, Philippines - Gipakita sa Teleperformance Lions nga mas bangis sila batok sa Wipro Tigers pinaagi sa pagtangag og daog, 60-56 sa 9th CSCC E-League basketball tournament niadtong Sabado didto sa City Sports Club-Cebu gym sa Cebu Business Park.
Hugot kaayo ang duwa sa duha ka mangtas gikan sa pagsugod hangtod nahuman diin ang makabentaha dili molabaw og kapin sa kuwatro puntos.
Human sa unang 10 minutos sa duwa, ang Teleperformance miabante la'g dos puntos, 16-14, apan ilang namintinar ang momentum hangtod sa himalatyong oras aron maka-eskapo bitbit ang kuwatro puntos nga kadaugan.
Si Marco Antonio Real maoy daku'g natampo nga iskor alang sa Teleperformance pinaagi sa iyang 18 puntos, gisundan ni Joselito Ruiz nga adunay 11 puntos.
Si Neptune Carungay mao usab ang nangulo sa pilderong Wipro nga mihabwa og 21 puntos, samtang si
Reinario Salibay Jr. mikandos og 15 puntos.
Sa laing bahin, ang Sykes Pioneers ug ang Kyocera Frontiers midaog pinaagi sa "default" batok sa Talleco Bandits ug Author Solutions Inc. (ASI) Hardbacks.
PUNTOS MATAG USA
Teleperformance (60) - Real 18, Ruiz 11, Delalamon 7, Petallo 7, Verallo 5, Pineda 4, Sadaya 3, Seva 2,
Abella 2, Abala 1
Wipro (56) - Carungay 21, Salibay 15, Taok 4, Ygot 4, Cabrera 4, Deodoro 4, Tan 2, Pestaño 2 (BANAT PALARO)