Stream mitumba sa 1&1, Wipro nakaipsot sa Sykes
CEBU, Philippines - Padayong mikubkob og daog ang defending champion Stream Ingenyouity, ning higayon batok sa 1&1 Marauders, 77-64 sa nagpadayong aksiyon sa 9th CSCC E-League basketball tournament niadtong Domingo didto sa City Sports Club-Cebu gym sa Cebu Business Park.
Gumikan niini, ang Stream nakigsawo sa liderato sa Southern Conference uban sa Aegis Vipers, kinsa miinat sa ilang win-loss record ngadto sa 8-1 human midaog pinaagi sa "default" batok sa Author Solutions Inc. (ASI) Hardbacks.
Ang Stream naghangad sa tim-os nga performance gikan sa kapid-an nilang mga magduduwa nga gipangulohan ni Joselito Aranda, kinsa mitusak og 15 puntos uban ang 10 ka rebounds ug tulo ka assists.
Si Marvin Alquilos miamot og 13 puntos, samtang ang one-time league MVP nga si Sylvester Millevo mitampo'g 12 puntos alang sa Stream nga milabaw la'g usa ka lugas sa halftime, 30-29. Apan ang Stream nga nakakuha sab og 10 puntos gikan ni Iven Cres de Torres, milusad og 27-14 rally sa third period aron moposte'g 14 puntos nga bentaha, 57-43 paingon sa final quarter.
Ang 1&1 wala na makarekober sukad niadto nga nakaangkon sa ilang ikaunom nga pilde sud sa siyam ka duwa.
Si Jan Gabest Isiah maoy nangulo sa Marauders nga miburak og 24 puntos, gisundan ni Arnel Azarcon nga adunay 14 puntos.
Sa sayo pa, si Reinario Salibay Jr. mibugha og 24 puntos aron pangulohan ang Wipro Tigers ngadto sa ilang 63-60 nga kadaugan batok sa Sykes Pioneers.
Sa maong kadaugan, ang Wipro temporaryo karong nagsolo sa liderato sa Bracket A sa Southern Conference sa ilang 7-2 win-loss record, samtang ang Sykes nagpabilin sa ikaduhang dapit bitbit ang 5-4 nga baraha.
Si Frederick Montelibano maoy topscorer sa Sykes nga mipabuhagay og 18 puntos, gisundan ni Gerald Bien Galarido sa iyang 16 puntos. (BANAT NEWS)
- Latest
