Ilog sa ikatulo

Nagbaton na og "twice-to-beat" incentives ang University of San Carlos (USC) Warriors ug University of San Jose-Recoletos (USJ-R) Jaguars, apan hinugtanay gihapon sa bakus ang mahitabo kay mag-ilog sila sa ikatulong dapit sa pagtapos sa elimination round sa 13th Cebu Schools Athletic Foundation Inc. (CESAFI) basketball tournament karong gabii diha sa Cebu  Coliseum.

Pareho  naghupot og 3-2 nga baraha, ang modaog sa Warriors-Jaguars showdown maoy seeded third ug makigsangka sa University of Cebu (UC)  Webmasters sa quarterfinals round sugod karong Huwebes, samtang ang mapilde moharong sa fifth-ranked Cebu Institute of Technology-University (CIT-U) Wildcats.

 Isip top qualifier, ang walay pildeng Southwestern University (SWU) Cobras nga nagtangag og 6-0 nga baraha, nakakuha na'g luna sa semifinal, samtang ang No. 2 seed University of the Visayas (UV) Green Lancers kinahanglan unang mopilde sa lowest seed University of Southern Philippines Foundation (USPF) Panthers aron moabante sa semis.

 Medyo makabentaha ang Jaguars sa ilang duwa karong alas-7:30 sa gabii batok sa Warriors, kinsa moduwa nga wala silang Charles Pepito ug Dominic Adlawan nga gisuspenso og duha ka duwa tungod sa "unsportsmanlike" conduct sa ilang 67-64 nga kadaugan batok sa UC Webmasters niadtong  Sabado sa gabii didto sa USC gym sa dalan Sanciangko.

 Sa secondary matches,  ang Cebu Eastern College (CEC) Dragons naglaum nga moangkon sa ikaduhang lingkoranan sa dihang ilang sangkaon ang UC Junior  Webmasters.

 Sugdan ang ilang duwa sa alas-5:45 sa hapon, human sa  sangka sa Don Bosco Technology Center (DBTC) Greywolves nga mosuway pagsumpo sa posibleng 0-8 shutout batok sa USJ-R Baby Jaguars. (BANAT PALARO)