CEBU, Philippines - Kulbahinam nga aksiyon ang masaksihan sa Cebuano fight fans sa ipahigayong Mixed Martial Arts (MMA) showdown sa 7th edition sa Ground and Pound series nga uloha'g "Resolution" karong gabii diha sa Cebu Coliseum.
Sa main event sa maong MMA showdown, magdinumogay ang duha ka higante nga sila si Cris 'Lindol' Brooks ug Lloyd 'Destroyer' Abucayan alang sa bakanteng heavyweight championship.
"I acknowledge his (Abucayan) achievements being a wrestling champion and a judo blackbelter, but this is MMA and wherever he takes the fight, whether it’s in the ground or standing up, I’ll make sure he will regret it," matud pa sa 6-foot-2 British fighter nga si Brooks.
Sa iyang bahin, ang 18-anyos nga si Abucayan mitataw nga wala siya mahudlat sa gidak-on ni Brooks tungod kay salig siya sa iyang abilidad nga makahimo og upset.
"Daku akong kontra. Kusgan siya ug mas taas nako, apan ipakita nako nga dili ko moatras ug masaksihan ninyo ang kaisog sa usa ka Davaoñeo," matud pa ni Abucayan.
Gawas sa GPC heavyweight showdown, laing tulo ka bakus ang awayan dihang si Lorde Rey 'Punisher'
Yamit sa Mindanao modepensa sa iyang GPC lightweight title batok ni Kru Robert 'Maldito' Serdone sa Redneos Iron Gladiator MMA sa Talisay City.
Sila si James 'Spider' Serenio ug URCC veteran Victor 'Gladiator' Torre magsangka alang sa GPC flyweight belt.
Sa bugtong kickboxing match, si Yaw-Yan Fighting Challenge (YFC) champion Renante 'Limbas'
Noblefranca mohimo sa iyang ikaduhang title defense batok ni Marjun 'Muma Warrior' Porriento, kanhi sakop sa Philippine Muay Thai team.
Mokompleto sa fight card mao ang sangka nila ni Mark 'Terminator' Araneta batok Rik 'Hammer' Cubillas, Maxlito 'Hyper Eagle' Yong batok Frederick 'Spider' Lim, Erving 'Zombie' Mosico batok Rocky Tune 'Outlaw' Batolbatol, Moises 'Tarzan Boy' Nudalo batok Urtych 'Tank' Allarin, Alex 'Pilot' Abraham batok Perkins 'Predator' Calixto, Lemuel 'Musang' Maglinte batok John Edu 'Excalibur' Torbiso, Ralp Loui 'Silent Assassin' Arcayan batok Jess 'Alpa' Catayas ug Leo 'Lion X' Rodrigo batok Ismael 'Tsunami Walk' Gomez.
Ang mga tiket mapalit sa tag- P200 sa upper box, P400 sa lower box, P750 sa ringside ug P1,500 alang sa VIP seats.