CEBU, Philippines - Abante na sa finals ang Philippine Institute of Certified Public Accountants (PICPA) human sa ilang kadaugan batok sa Young Lawyers Association of Cebu (YLAC), 75-64 sa nagpadayong IBP-Wednesday Club basketball tournament didto sa Capitol Parish gym sa dalan Escario, ning dakbayan.
Ang PICPA ni Yoly Meso naglabaw og singko puntos sa opening period, 20-15 sa giya ni three-point artist Lito Ortiz. Padayong nanginit ang PICPA sa third period ginamit ang 20-13 scoring run aron molabaw og 15 puntos, 56-41 paingon sa final period.
Misuway unta'g rally ang YLAC pinaagi sa ilang 23-19 run luyo sa paningkamot nilang Cris Ang, Rey Gealon ug Richie Capahi, apan kutob lang sila pagkitkit sa labaw.
Ang PICPA maoy makigsangka batok sa IBP-Gwapo alang sa finals karong Miyerkules.
Silang Ortiz ug Andre Tocao maoy nangu sa PICPA sa ilang 15 puntos matag usa, samtang si Meso miamot og 11 puntos.
Ang YLAC gipangulohan ni Ang pinaagi sa iyang 18 puntos, silang Gealon ug Capahi nagkumboya'g 21 puntos.
PUNTOS MATAG USA
PICPA (75) - Ortiz 15, Tocao 15, Meso 11, Ibo 8, Zabala 6, Flores 5, Alejandre 4, Bonsucan 4, Gonzales 2
YLAC (64) - Ang 18, Gealon 11, Capahi 10, Guieb 6, Verallo 6, Caguas 6, Remedio 4, Velez 3