CEBU, Philippines - Nakabawi dayon ang Davies Paints gikan sa ilang lab-as nga kapildihan dihang ilang gipahungawan sa ilang kalagot ang Batch 2009 sa iskor, 67-45 sa nagpadayong Bosconian Basketball Club's Don Bosco Cup niadtong Domingo didto sa University of San Carlos (USC)-North Campus gym.
Ang Davies Paint maoy midiktar sa duwa human miabante og siyete puntos, 17-10 pagsugod.
Sila si Duane Dale Anino ug Azanza miposa og upat ka triples sa ilang 20-11 scoring run nga nakapainat sa ilang labaw ngadto sa 16 puntos sa halftime, 37-21.
Padayong mipauwan ang Davies Paint sa katapusang duha ka kuwarter diin ilang gipauwanan ang Batch 2009 og 22-13 aron maangkon ang 22 puntos nga kadaugan.
Sa laing mga duwa, ang Superstarred naka-eskapo batok sa Amchels sa iskor nga 45-42, samtang ang Plas milubong sa Batch '97 sa iskor nga 76-63.
Ang Superstarred mipahimulos og 13-2 nga bentaha sa first period ug mitubo pa kini ngadto sa 17 puntos sa halftime, 28-11.
Mi-rally ang Amchels aron makan-an ang labaw ngadto na lang sa kuwatro, 28-32 human sa third period, apan ang Superstarred padayong nanglimbasog aron maangkon ang tres puntos nga kadaugan.
Sa laing bahin, ang Plas nagsalig sa init nilang duwa sa third period aron matumba ang Batch '97.
Tres puntos lang ang ilang labaw sa halftime, 36-33, apan nanginit kini sa ikatulong kuwarter aron moposte'g 56-45 nga bentaha paingon sa final period ug sukad niadto, wala na sila molingi pa hangtod nahurot ang oras sa duwa.
Ang mga partisipanteng koponan moduwa og single round robin format diin ang top four teams matag bracket moabante sa quarterfinals uban ang "twice-to-beat" advantage batok sa lower-ranked qualifiers.
Ang mga modaog momartsa sa crossover semifinals diin ang modaog maoy magsangka sa finals sa "best-of- three" series, samtang ang mga pildero magtinaktakay alang sa ikatulong puwesto. (BANAT PALARO)