CEBU, Philippines - Gisugat dayon og daog ang L&T Meat
Shop ni team owner Niño Semblante ug Pulpogan Selection sa Threes Mundoy pagsugod sa Kap Roy's Cup A
Pulpogan Friendly Invitational Tournament niadtong Biyernes sa gabii didto sa Barangay Pulpogan gym sa lungsod sa
Consolacion, Cebu.
Ang L&T Meat Shop ni assistant coach Bryan Burlaos mipilde sa D' Jinx ni team owner Joel Rumbaiz sa iskor
nga 65-69, samtang ang Pulpogan Selection miihaw sa Pitogo's Syria's Kandingan ni Junjun Pepito sa iskor nga 71-64.
Tulo ka players sa L&T Meat Shops ang miiskor og double figures sa pagpangulo ni Jerome Valle, kinsa
mitadtad og 18 puntos. Si Randy Colonia milugit og 12 puntos, samtang si Lemar Dahil misansan og 10 puntos.
Gipangulohan sab ni Rumar Ponce ang naparot nga D' Jinx Team pinaagi sa iyang 19 puntos, gisundan nilang
Antonio Linao ug Erwin Brigoli nga mihabwa og 13 puntos matag usa.
Sa laing bahin, sila si Russel Moneva ug Jofel Bangcal nagkumboya og 31 puntos aron giyahan ang Pulpogan
Selection pag-iskor og daog.
Mao usab silang Jojo Maglasang ug Junard Pales nga nagkumboya og 31 puntos aron pangulohan ang
napildeng Pitogo's Syria's Kandingan.
Kulbahinam kaayo ang duwa sa duha ka koponan diin nagpuli-puli kini'g labaw hangtod nga nasipyat og pasa
si Maglasang sa nahabiling 40 segundos sa regulasyon nga maoy nakabugto sa kahinam sa aksiyon.
Ang Pulpogan Selection mihimo'g duha ka steals nga maoy mihupay sa hilabihan nilang kakulba.
Ang upat ka adlaw nga liga mosubay og double round elimination diin ang koponan nga adunay duha ka pilde
awtomatik nga matagak, samtang ang top two teams maoy mag-abot sa finals.
Ang liga nga matapos ugma gipaluyohan ni Pulpogan Brgy. Capt. Hon. Roger R. Linaboc uban nilang Hon.
Adrian G. Isoto, Hon. Avelino G. Bihag, Hon. Raymond P. Villanueva, Hon. Geroncio M. Azucenas, Hon. Aileen Jane C.
Osabel ug Charle Mendoza. (BANAT NEWS)
PUNTOS MATAG USA
Unang duwa:
L&T MEAT SHOP (65) - Valle 18, Colonia 12, Dahil 10, Pepito 7, Dumaguit 7, Cabahug 4, Antigua 4,
Gerundio 3
D' JINX TEAM (59) - Ponce 19, Linao 13, Brigoli 13, Moriles 8, Dumadag 4, Tibaan 2
Ikaduhang duwa:
PULPOGAN SELECTION (71) - Rus. Moneva 20, Bangcal 11, Canaya 9, Ageas 8, Rex. Moneva 7,
Gungob 5, Amizola 4, Tudtud 3, Enad 2, Somosot 2
SYRIA'S KANDINGAN (64) - J. Maglasang 19, Pales 12, C. Conde 9, Larobes 7, Gonzaga 6, Pilapil 5,
Conde 2, Nillas 2, K. Maglasang 2