Ghost Riders nakaginhawa pa

CEBU, Philippines - Buhi pa gihapon ang paglaum sa Ghost Riders nga moangkon og lingkoranan sa semifinals human sila

makaipsot sa mga kamot sa Eskina  Riders, 56-52 sa Game-2 sa "best-of-three" quarterfinals sa Pulpogan Motorcycle

Owners and Drivers Association (PMODA) Third Conference Habal-Habal basketball tournament niadtong Domingo

didto sa Barangay Pulpogan gym sa lungsod sa Consolacion, Cebu.

 Si Rolando Yamelo Jr. miarangkada og 21 puntos, samtang si Elizar Personal mikadlit og 11 puntos alang sa

Ghost Riders nga pirmeng naggukod sa unang tulo ka mga kuwarter.

 Ang Eskina naglabaw og nuybe puntos sa halftime, 32-23 sa pagpangulo nilang Amay Cabilan ug Joseph

Lleve nga parehong miariya og double figures sa maong duwa.

 Naguba ang duwa sa Eskina Riders sa tunga-tungang bahin sa third quarter dihang naratol ug nakahimo'g mga

turnovers mugna sa hugot nga depensa nga gipatuman sa Ghost Riders.

 Nahimo nga kulbahinam ang duwa sa fourth period dihang nagtabla ang iskor, 42-all sa baskets ni Personal,

apan daling nailog pagbalik sa Eskina Riders ang labaw pinaagi ni Cabilan.

 Si Personal daku'g papel sa maong kuwarter dihang iyang napatabla ang iskor sa  makatulo ka higayon sa

wala pa moposa og tagsa ka 3-pointer silang Roel Bangcal ug Yamelo nga naghatag sa Ghost Riders og 54-48 nga

bentaha sa katapusang kuwatro minutos sa duwa ug wala na kini molingi pa sukad niadto.

 Si Cabilan maoy nangu sa Eskina Riders sa iyang 20 puntos, samtang si Lleve nga gisakyan og demalas sa

nahabiling dos minutos sa duwa mikimada og 15 puntos.

 Natukod ang maong torneyo pinaagi sa mga paningkamot ni Jerry Narandan ug kaubanan sa komitiba sama

nilang Wellington Cabalan, Jose Rumel Jumao-as, Ruben Querubin, Michael Quizon, Apale Arana, Ricky Orongan ug

Opao Cortes.

 Ang tinuig nga liga gipaluyohan sab  ni Pulpogan Brgy. Capt.  Roger R. Linaboc uban sa iyang mga konsehales

Avelino G. Bihag, Adrian G. Isoto, Geroncio M. Azucenas ug Raymond P. Villanueva. Suportado sab nilang municipal

councilor Julius P. Alegado, Poblacion Oriental councilor Paul Alelu Q. Flores ug community stakeholder Charle R.

Mendoza.

Puntos matag usa

 GHOST RIDERS (56) - Yamelo 21, Personal 11, Bangcal 9, Rosales 8, Capangpangan 4, Bacalso 2, Peña 1

 ESKINA RIDERS (52)  - Cabilan 20, Lleve 15, Etat 8, Sarsa 4, Ducay 2, Villamor 2 (BANAT NEWS)