Stream,Wipro daog na sab sa CSCC E-League
CEBU, Philippines - Padayon mikutlo og daog ang defending champion Stream Ingenyouity ug ang Wipro Tigers batok sa tagsa-tagsa nilang kaatbang sa 9th CSCC E-League basketball tournament niadtong Sabado didto sa City Sports Club-Cebu gym.
Ang league MVP ug Rookie of the Year nga si Sylvester Millevo mirehistro og 18 puntos uban ang lima ka rebounds aron pangulohan ang Stream pagkulit og 64-41 nga kadaugan batok sa Kyocera Frontiers.
Sila si Ivan Cres de la Torre, Roderick Mangubat ug Joselito Aranda nagkumboya og 24 puntos alang sa Stream nga kasamtangang lider sa bracket B sa Northern Conference sa ilang 6-1 nga baraha.
Ang Stream biya og usa ka lugas sa halftime, 22-23, apan milusad og 22-7 rally sa ikatulong kuwarter ug gitapos ang duwa pinaagi sa 20-11 run aron moposte'g 23 puntos nga kadaugan.
Si Randel Turo mao lang ang bugtong miiskor og double figure alang sa Kyocera pinaagi sa iyang 14 puntos.
Sa laing bahin, ang Wipro wala na molingi pa human miabante og 22-12 sa first period aron pagdemolis sa Talleco Bandits, 84-46.
Si Violeto Tan Jr. miiskor og 17 puntos ug milangkat og pito ka rebounds alang sa Wipro nga nagbitbit og 5-2 nga baraha. Si Reinario Salibay Jr. mitikdol og 13 puntos, samtang si Neptune Carungay mitimang og 12 puntos sa maong kadaugan.
Ang Talleco nga wala pa gyud makatilaw og daog sud sa walo ka duwa, gipangulohan ni Mark Matidios sa iyang 18 puntos, gisundan ni Junmar Estrada nga milansang og 12 puntos ug Andrew Joseph Isobla nga adunay 10 puntos.
Sa laing duwa, ang ePerformanx nga adunay 4-3 win-loss record nidaog pinaagi sa default batok sa Executive Boutique Lycans nga walay daog-daog sa pito nila ka duwa. (BANAT NEWS)
- Latest
