CEBU, Philippines - Milublob sa unang dapit sa standing ang defending champion University of Cebu (UC) ug University of San Carlos-Basic Education (USC-BED) sa tagsa-tagsa nila ka dibisyon sa ikaduhang adlaw sa 18th Milo Little Olympics Visayas Regional Finals niadtong Domingo didto sa Cebu City Sports Center (CCSC).
Ang UC nag-una sa secondary division nga mihipos og 70.5 points, gisundan sa USC nga adunay 50 points ug sa Antique National High School maoy third placer sa ilang 17.25.
Mibida sa UC mao ang ilang swimmers ug athletics team nga padayong nanghakot og bulawang medalya.
Sa swimming, si Michael Ichiro Kong mipupo na sab og gold medals human maghari sa 200m butterfly ug 100m backstroke. Si Karen Mae Indaya mikabkab sab og bulawan sa secondary girl’s 800m freestyle.
Ang UC mihakot sab og lima ka bulawan sa athletics event sa pagpangulo ni Shantel Tanucan nga nanghawod sa long jump ug high jump. Lain pang naka-gold mao sila si Joseph Camingao sa 110m hurdles ug Doren Romeral sa girls division ug Rozel Ardiente.
Mitunol usab og duha ka bulawan sila si Andrae Lim, Zozen Prajes ug Kristian Tagarao pinaagi sa taekwondo.
Sa ilang bahin, ang USC-BED mao usab kasamtangang nag-una sa elementary level sa ilang 63 puntos, nagsunod ang Talisay South Elementary School sa Negros Occidental nga adunay 27.5 points ug St. John Institute-Bacolod sa ilang 25 points.
Si Alfeo Vallespin mitunol sab og duha ka golds sa UC-BED pinaagi sa 100m breaststroke ug 50m freestyle. Ang USC mao usab ang midaog sa boys elementary 200m freestyle relay (2:31.11), 400m medley relay ug 100m freestyle relay. Ang girls division maoy kampiyon sa 400m medley relay.
Mikabkab usab og bulawan ang mga atleta sa USC-BED sa track and field event.
Si Mary Joy Loberanis mikabkab og duha ka bulawan sa 1,500m ug 800m run, si Antonio Czar Octaviano sa 200m ug Gleizel Faith Pelayre sa 110m hurdles.
Nakakuha usab og gold si Ivan Miguel Santos sa 5000m ug si Joseph Berdin nga midaog sa discus throw event. (BANAT NEWS)