CEBU, Philippines - Tuyo sa defending champion Southwestern University (SWU) Cobras nga inaton o pahugtan og samot ang ilang pagkupot sa solong liderato dihang ilang ikasangka ugma ang wala pa'y daog nga University of Cebu (UC) Webmasters sa nagpadayon nga 13th season sa Cebu Schools Athletic Foundation, Inc. (CESAFI) diha sa Cebu Coliseum.
Human sa ilang 70-66 nga kadaugan batok sa University of the Visayas (UV) Green Lancers diin ilang nasakmit ang solong liderato sa ilang 3-0 nga baraha niadtong Sabado, tinguha sa Cobras nga mokulit sa ilang ika-upat nga daog. Tataw na kaayong humanon sa Cobras ang elimination round isip no. 1 qualifier diin segurado silang mo-abante sa semifinals isip top seed.
Ang Webmasters wala pa'y daog sulod sa duha ka duwa.
Niadtong Sabado, lain na sab nga kulbahinam ug sikit nga duwa ang gihimo sa Cobras aron sila makaikyas sa kataposang pipila ka segundos ug dako unta kaayo'g purohan nga modaug ang Lancers bisan og nabiyaan sila'g 13 puntos sa sayo pa, 10-23 sa first period ug laing 18-31 sa tunga-tungang bahin sa second quarter apan misikit sila sa halftime, 31-34 human sa three-pointer ni Venhur Villamor.
Kanunay gihapon naglabaw ang Cobras sulod sa mosunod duha ka quarters apan kanunay sab mosikit ang Lancers apan wala gyud sila molabaw.
Migahub og maayo ang sulod sa Coliseum, pinaagi sa hugyaw sa mga pro-UV fans dihang misikit ang Lancers, 66-67 sa nahibiling 1:21 ang oras sa duwa ug gihatagan sila sa Cobras og sagunson duha ka higayon nga modaug dihang misaler ang ilang hugot nga depensa hinungdan nga nakahimo'g duha ka 24-second shot clock violation ang nauwahi.
Labaw lang gihapon og usa ka palito ang Cobras, 67-66 apan ball possession sa Lancers sa nahibilling 10.2 segundos ug igo pa kaayong makahimo sila'g milagro alang sa posibleng come-from-behind nga kadaugan apan wala natarung og dakop ni John Michael Abad ang inbound pass ni Francisco Arong, Jr. sa sideline ug napugos sila'g foul ni Landry Sanjor, ang Cameroon import aron mabinlan sila'g oras.
Igo lang nakahimo'g usa ka free throw si Sanjo, 68-66 may 5.5 segundos ang oras ug ang duha ka free throws ni Monbert Arong maoy nagselyado sa kadaugan sa Cobras, 70-66 may 1.4 segundo ang oras.
Si Arong maoy nangu sa Cobras sa iyang 19 puntos ug midugang silang Mark Jayven Tallo ug Bernie Bregondo ug 11 ug 10 puntos matag usa.
Ang Lancers kinsa padayon nga gidominar sa Cobras sukad pa sa miaging CESAFI season, gipangulohan ni Abad kinsa mibahug og 20 puntos ug miamot si Wowie Escocio og 11 puntos.
Puntos matag usa:
SWU (Coll.) 70--- Arong 19, Tallo 11, Bregondo 10, Sanjo 9, Mohammed 8, Sewe 5, Ortega 4, Goloran 4.
UV (Coll.) 66--- Abad 20, Escocio 11, Villamor 8, Nzuessue 7, Akomo 7, Arong 5, Codilla 4, Cabañero 2, Perolino 2. (BANATSPORTS)