CEBU, Philippines - Usa ka British Mixed Martial Arts (MMA) fighter nga si Cris "Lindol" Brooks ang moaway alang sa Sugbu
uban ang paglaum nga masakmit ang Ground and Pound Championship (GPC) heavyweight belt batok sa Davaoeño nga
si Lloyd Abucayan.
Ang garbo sa Yaw-Yan ArDigma Cebu nga si Brooks ug Abucayan sa Mindanao's Beefit Pythons Pit
magsangka sa main event sa "Ground and Pound 7: Resolution" Mixed Martial Arts showdown karong Agosto 31 diha sa
Cebu Coliseum.
Sa iyang ikaduhang pro MMA bout, si Brooks miangkon nga gamay ra ang oras sa iyang preparasyon kay
miuli kini sa United Kingdom tungod sa personal nga rason.
Hinuon, si Brooks nga nag-ensayo ubos sa giya ni Yaw-Yan ArDigma Cebu Founder Master Benigno 'Ekin'
Caniga Jr. mideklara og gira batok sa wrestling ug judo expert nga si Abucayan.
"I am from England but I will represent Cebu. Cebu is like my second home and I will not let that belt leave
there," matud pa ni Brooks nga mobalik sa Sugbu karong Sabado aron padayonon ang iyang ensayo sa Yaw-Yan
ArDigma gym.
Sa iyang bahin, si Abucayan nga usa ka judo black-belt ug two-time gold medalist sa wrestling nangahas usab
pagpukan ni Brooks isip panimawos human kulataha ni Brooks ang iyang teammate ug kanhi URCC fighter nga si Gygz
Ocampo sa miaging tuig didto sa Cagayan de Oro City.
Ang mga tiket nagkantidad og P200 sa upper box, P400 sa lower box, P750 sa ringside ug P1,500 sa VIP
seats.
Alang sa ticket reservations, mahimong motawag sa numero 0932-4524999. (BANAT NEWS)