USC SBP wala pay pilde sa upat nila ka mga duwa

CEBU, Philippines -  Pabilin gihapon nga walay pilde ang University of San Carlos (USC) SBP team sud sa upat ka duwa.

 Ang USC yano kaayong milubong sa University of San Jose-Recoletos (USJ-R), 63-22 aron mokulit sa ilang ikaupat nga daog sa SBP division sa BEST SBP Passerelle Twin Tournament didto sa USC North Gym sa General Maxilom Avenue.

 Gikan sa 11-1 nga iskor sa first period,  kalit miburot ang labaw sa USC ngadto sa 29-5 atol sa halftime ug wala sila manumbaling pa sa mosunod nga duha ka kuwarter.

 Si Antonio Czar Octaviano maoy nangu sa USC sa iyang 12 puntos samtang si Vince Razo midugang og 10 puntos.

 Sa laing duwa sa SBP division sa miaging weekend, ang University of the Visayas (UV)  midaog sab batok sa Sacred Heart School-Ateneo de Cebu (SHS-AdC) sa iskor nga 32-26, samtang ang Cebu Eastern College (CEC) miihaw sa SHS-AdC, 51-27.

 Sa mga sangka sa Passerelle division, ang USC mikulit sa ilang ikaduhang daog   human nila gipilde ang Sacred Heart School-Ateneo de Cebu  sa iskor nga 67-62.

 Nabiyaan unta ang USC  sa halftime, 19-31, apan hinay-hinay silang miapas ug misikit ngadto na lang sa kuwatro puntos, 46-50 pagsugod sa fourth period.

 Gisugdan sa USC ang fourth period og 11-0 run aron sakmiton ang liderato, 57-50. Mibawos  ang SHS-AdC aron ilogon pagbalik ang labaw, 60-58,  apan dali ra sab kining napapas , 65-60 sa nagkaupos na nga oras.

 Si John Galinato maoy nangu sa USC sa iyang 15 puntos, gisundan ni Scott Aying nga adunay 13 puntos.

 Sa lain pang aksiyon, ang  UV milubong sa SWU sa iskor nga 72-10, samtang gipanitan sab sa CEC ang USJ-R, 93-36. (BANAT PALARO)