CEBU, Philippines - Walay kukaluoy nga gimasaker sa Aegis Vipers ang Kyocera Frontiers, 100-49 aron magpabiling walay pilde sud sa unom ka duwa sa 9th CSCC E-League basketball tournament niadtong Domingo didto sa City Sports Club-Cebu gym sa Cebu Business Park.
Si Rodulfo Enterina III mitusak og 18 puntos alang sa Aegis nga walay puangod midabo-dabo sa Kyocera human moposte'g 35-13 nga bentaha sa first period.
Namugnaw ang opensa sa Aegis sa ikaduhang kuwarter, apan miulbo pagbalik ang ilang kainit sa second half diin miduslit kini og 46-20 run aron moposte og 51 puntos nga kadaugan.
Si Steve Warren Navarra miamot og 16 puntos alang sa Aegis nga nakakuha sab og suporta gikan nilang Matt Ian Zanoria ug Kevin Clark Navarra nga mitampo'g 13 puntos matag usa. Si Dean Junber Escalon mihimo sab og double-figure alang sa Aegis pinaagi sa iyang 12 puntos.
Ang Kyocera nga wala pa gyud makatilaw og daog sud sa unom ka duwa, gipangulohan ni Ariel Ramonito Edera nga mikadlit og 17 puntos.
Sa lain pang mga aksiyon, si Ivan Agustin miiskor og crucial lay-up sa katapusang 1.9 segundos sa duwa aron pangulohan ang ASI Hardbacks ngadto sa kulbahinam nga kadaugan, 67-65 batok sa 1&1 Marauders, samtang si John
Denver Rivera mipabuto'g 21 puntos alang sa SSI Warriors nga midemolis sa Talleco Bandits, 74-57. Si Agustin mihipos og 15 puntos ug milangkat og tulo ka rebounds ug si Martin Ian de Guzman mitimbre og 13 puntos alang sa ASI nga nagbitbit og 2-4 nga baraha, samtang ang 1&1 Marauders nakatilaw sa ilang ikalimang pilde batok sa duha ka daog.
Sa laing bahin, si Raymund Ardiente mitikdol og 13 puntos alang sa SSI nga mikutlo sa ilang ikaduhang daog sa pito ka duwa.