Cebuano student-athletes misidlak sa ironman
CEBU, Philippines - Tulo ka batan-ong student-athletes ang nakahatag og dungog sa Sugbu dihang sila ang giilang kampiyon sa
mixed relay division sa Cobra Ironman 70.3 Philippines niadtong Domingo didto sa Shangri-La's Mactan Resort and Spa
sa Lapu-Lapu City.
Ang Cebu Students MultiSports Team gilangkuban sa 18-anyos nga junior cyclist Luis Miguel 'Igimax'
Maximo sa Ateneo de Manila University (AdMU), 20-anyos nga swimmer Loren Dale Echavez ug sa 19-anyos runner RJ
Lao, nga pulos tinun-an sa University of San Carlos (USC).
Nakuha nila ang unang dapit human nila gitapos ang kinatibuk-an lumba sud sa lima ka oras, tulo ka minutos ug
59 segundos.
Gilupig nila ang laing lig-on nga team lakip ang second placer Team Almond sa USA ug third placer Clear
Sabak sa Manila.
Ang kadaugan nakapahimo kanila isip bugtong mga Sugbuanon nga milangkat og championship title sa regular
age-group, relay o Filipino elite division sa international event nga nakadani og kapin sa 2,150 ka mga entrante gikan sa 35
nga kanasoran sa unom ka continents.
Sila usab ang labing bata nga relay team sa 1.9km swim, 90km bike ug 21km run triathlon race.
Ang tulo wala pay plano nga modepensa sa ilang titulo sunod tuig. Mobalik una sila sa ilang tagsa-tagsa ka
eskwelahan. Si Loren Dale usa ka graduating 4th year student sa kursong BS Biology sa USC, si Luis Miguel, ang two-
time SAC awardee ug YKK rider mobalik sa Manila alang sa iyang 2nd year Information Design (ID) course sa Ateneo,
samtang si RJ usa ka second year student sa kursong Mechanical Engineering. (BANAT NEWS)
- Latest
