Kameda bag-ong WBO champion

CEBU, Philippines -  Gituman ni Japanese ring star Tomoki 'El Mexicanito' Kameda ang pangandoy sa iyang amahan nga mahimong kampiyon   human moiskor og "unanimous decision" nga kadaugan batok ni Paulus 'The Rock' Ambunda sa Namibia aron sakmiton ang  WBO bantamweight title sa main event sa "Battle of the Undefeated" fight card niadtong Huwebes sa gabii didto sa Waterfront Cebu City Hotel and Casino.

 Si Kameda mipahimulos sa iyang kapaspas ug ingon man footwork ngadto ni Ambunda, kinsa nagkapuliki og pagpanagang.

 Sa kaabtik ni Kameda, wala   makaporma'g maayo si Ambunda, kinsa igo lang nakapatama  og straight-hook combination nga nakapabarag sa Chinese fighter.

 Gikan didto wala na  makapatugpa pa og solidong kumo si Ambunda ug gihimo na lang siyang punching bag ni Kameda hangtod na sa 12 rounds.

 Tulo ka mga hurado ang mihatag og 118-110, 116-112 ug 117-111  pabor ngadto ni Kameda nga miinat sa iyang rekord   ngadto sa 28-0, 18KOs, samtang ang kanhi Olympian nga si Ambunda nakahiagum sa una niyang pilde sud sa 21 ka away.

 Sa maong kadaugan, si Tomoki Kameda uban sa iyang mga maguwang nga sila si Koki ug Daiki mikulit og

kasaysayan isip labing unang managsuong boksidor nga nahimong world champions.

 Sa supporting main event,  Marlon Tapales (23-2, 9KOs) misakmit sa bakanteng WBO Asia Pacific

bantamweight title human midaog pinaagi sa "unanimous decision" batok ni Fredirex Rodriguez (11-3, 8KOs) sa Bukidnon.

 Si Gerpaul Valero  (15-14-3, 10KOs) sa Noy  Pacing Flores Stable  milampos pagtubag sa labing lisud nga hagit sa iyang karera dihang midaog kini pinaagi sa "split decision"  batok ni WBC flyweight champion Sonny Boy Jaro (34-13-5, 24KOs). (BANAT PALARO)