CEBU, Philippines - Giatngan ang usa ka tensyonado nga panagkita nila ni WBO bantamweight champion Paulos 'The Rock' Ambunda sa Namibia ug Japanese challenger Tomoki 'El Mexicanito' Kameda sa press conference karong adlawa diha sa Waterfront Cebu City Hotel and Casino.
Ang South African champion nga si Ambunda modepensa sa labing unang higayon sa iyang bakus batok ni Kameda sa main event sa "Battle of the Undefeated" fight card karong Huwebes sa gabii diha sa Waterfront Hotel.
Wala pa gani magkita, aduna nay namugna nga personal nga pagdumot ang duha ka boksidor basi usab sa ilang mga pamahayag sa mga media sa managlahing interbyu.
Unang mipasingit si Kameda ug iyang gibaharan si Namibian champion nga pakamangon ibabaw sa ring.
"It’s going to be a war. I am going to knock him out and I am pretty sure that the fight will not last the distance," matud pa ni Kameda.
Ning bag-o lang, si Ambunda mibawos ug iyang gihulagway si Kameda nga huyang nga boksidor. Matud pa ni Ambunda siya ang tinuoray nga moiskor og knockout ug andam kini mopatumba sa Japanese fighter bisan unsa nga round.
Si Ambunda adunay rekord nga 20-0, 10KOs, samtang si Kameda nagbitbit og 27-0, 18KOs.
Sa laing bahin, mahimo na nga mapalit ang mga tiket sa maong away didto sa Waterfront Hotel lobby. Nagkantidad kini og P2,500 sa VIP, P800 sa gold seat, P500 sa ballroom ug P200 sa balcony.