Melindo napakyas

CEBU, Philippines - Pait nga kapildehan ang gidangatan ni ALA Boxing Gym stalwart Milan ‘El Metodico’ Melindo (29-1, 12KOs) human siya pakyas pagsakmit sa WBO/WBA flyweight championship batok ni Juan Francisco ‘El Gallo’ Estrada (25-2, 18KOs) niadtong Sabado sa gabii didto sa Cotai Arena sa The Venetian Hotel and Casino sa Macau.

Mipakita og kaisug si Melindo batok ni Estrada, apan mas mipatigbabaw ang abilidad ug kaagresibo sa Mexican fighter batok sa Filipino challenger.

Nindot ang gipakita sa 25-anyos nga si Melindo sa sugod sa away dihang mipaigo siya og mga solid shots ngadto sa ulo ni Estrada kinsa mibarag sa fourth round.

Apan kalit lang mibali ang momentum pabor ni Estrada human makahiagum og lawom nga gisi sa iyang kilay si Melindo kinsa naglisud na paglihay sa mga jab ug straight ni Estrada.

Sa pagpadayun sa pag-agas sa dugo sa iyang kilay, mipadayun gihapon si Melindo pakigsinukliay og kumo ngadto ni Estrada, apan wa niya malihayi ang usa ka kusug nga counter right hook gikan sa Mehikano nga mipalingkod kaniya sa eleventh round.

Si Melindo nakarekober sa knockdown, apan misamot ka-agresibo ang Mehikano ug gipauwanan siya og mga kinumo diin nakahimo pa siya pagpugong hangtud nga mibagting ang katapusang kampanilya.

Human sa dose ka rounds, si Judge Rafael Ramos, Takeshi Shimakawa ug Zolta Enyei miiskor og 118-109, 117-109 ug 118-109 tanan pabor ngadto sa Mexican champion kinsa mao usab ang mipilde ni Fil-American Brian Viloria niadtong Abril 6 sa susamang venue.

Sa iyang post sa facebook, gipasalamatan hinuon ni Melindo ang tanang Pinoy nga mihatag sa ilang pag-ampo ug suporta ngadto kaniya dungan sa pagsaad nga mubangon aron subling makakuha pagbalik og world title shot.

“Sorry I lost the fight, but I know God has a good plan for me. Someday I will rise again by the will of God and I will be a world champion,” matud pa ni Melindo.

Sa laing bahin, ang stablemate ni Melindo nga si Genesis ‘Azukal’ Servania (22-0, 8KOs) nakadepensa sa iyang WBO Asia Pacific super bantamweight title pinaagi sa ninth round technical majority decision batok Japanese Konosuke Tomiyama (23-6, 8KOs).

Midaog usab ang undefeated Cebuano southpaw nga si Dave ‘The Hunter’ Peñalosa (7-0, 5KOs) kinsa nangayu lang og 45 segundos aron i-knockout si Thai Ngaotawan Sithsaithong (10-10, 5KOs).