1st Roger Abella chessfest sa Hulyo 27-28

CEBU, Philippines - Nangandam na usab ang mga Sugbuanong pawnpushers  alang sa ipahigayong 1st  Roger T. Abella Memorial Open Chess Tournament  sa Hulyo 27-28 diha sa   E-Mall  Activity Center.

 Ang FIDE-rated (International Chess Federation) event himuon agi'g paghandom  sa kamatayon sa Sugbuanong sportsman nga si Roger T. Abella, kinsa aktibong nalambigit sa pag-promote sa chess ug scrabble sa dihang buhi pa siya.

 Ang 7-round Swiss system competition bukas sa tanang magduduwa, migahin og P21,000 nga ganting salapi alang sa top performers.

 Ang kampiyon mobulsa og P6,000, ang second placer makadawat og P4,000 ug ang third placer makaangkon og P2,000.

 Mokapyot sa ikaupat ug ikalima nga dapit gantihan og P1,000 ug P800 matag usa.

 Ang mopahiluna gikan sa ika-unom hangtod sa ikanapu nga dapit hatagan og P500  matag usa, samtang kadtong mo-okupar gikan sa ika-11 hangtod sa ika-20 makadawat og consolation prize nga P300 matag usa.

 Ang kampiyon sa kiddies, ladies, seniors ug sa 10-under categories makadawat og dugang P500.

 Alang sa dugang mga kasayoran, niadtong interesadong  mosalmot mahimong mokontak ni  FIDE arbiters Marvin Y. Ruelan sa 0926-7352951 ug Felix C. Poloyapoy Jr. sa 0933-6642958.

 Ang duha ka adlaw'ng kompetisyon nga gipasiugdahan  sa   Four Central Squares Chess Association (FCSCA), ang umbrella organization sa National Chess  Federation of the Philippines (NCFP) ug gipaluyohan sa Rose Pharmacy Inc. pinaagi ni Boogie Lim.