CEBU, Philippines - Trese ka sunod-sunod nga puntos ni kanhi USJ- R Baby Jaguars Baeng Medalle sa final period maoy mikati sa 25-13 run sa MJDL Brokers aron moposte og 73-66 nga kadaugan batok sa Cebu International Port Users (CIPU) Warships sa Game-1 sa "best-of-three" series sa Cebu Customs Invitational Tournament niadtong Martes sa gabii didto sa USC-North Campus gym sa General Maxilom Avenue.
Kinahanglang modaog ang MJDL ni Mike Logarta karong gabii aron magsaulog sa ilang kampiyonato.
Biya ang MJDL ni coach Caleb Gawangon paghuman sa third period, 48-53 apan daw nag-aso sa kainit si Medalle dihang mihimo siya'g walo ka sunod-sunod nga puntos pagsugod sa fourth period aron sakmiton ang liderato, 56-53.
Maayo kaayong pagkahimo ang trapping defense sa MJDL ug medyo nakalitan ang Warships kay wala nila damha nga ingon niadto kabangis ang opensa nga gipakita sa ilang kontra nga maoy nakaguba sa ilang diskarte.
Si Medalle maoy nangu sa MJDL sa iyang 24 puntos, samtang si Nico Laborte miamot og 13 puntos.
Silang Takloy Moral ug Francis Palero mibahog og 23 ug 20 puntos matag usa alang sa Warships kansang tahas mao ang pagtabla sa series karong gabii sa Game-2.
Sa laing bahin, magsangka sa knockout match ang PhilHealth ug Customs Portmen ni Mactan Collector Bingo Matugas alang sa third place trophy sa preliminary karong gabii.
PUNTOS MATAG USA
MJDL (73) - B. Medalle 24, N. Laborte 13, Enriquez 9, Abellana 6, Bensi 5, Rollon 4, N. Medalle 3, T. Laborte 3, Elloren 2, Arreglo 2, Cal 2
CIPU (66) - Moral 23, Palero 20, Aniñon 6, Allerite 6, Garcia 4, Villaronza 3, Niones 2, Largosa 2, Sagario 1 (BANAT NEWS)